Собиқ президент КХДРни ҳарбий тажовузга ундаган – прокурор

Жанубий Кореянинг собиқ президенти Юн Сок Ёль Шимолий Кореяни ҳарбий тажовузга ундашга уринган. Бу ҳақда мамлакатнинг махсус прокурори Чо Ин Сок маълум қилди. 

Прокурорнинг айтишича, Юн бу йўл билан 2024 йил декабрь ойида мамлакатда ҳарбий ҳолат жорий этилишини оқламоқчи бўлган. 

Чо Ин Сокнинг билдиришича, Юн Сок Ёль ҳарбий ҳолат режимини эълон қилиш ва сиёсий рақибларини четлатиш учун айнан шундай сценарийга умид қилган.

Махсус прокурорлар гуруҳи қўзғолон ишидаги эҳтимолий иштироки учун жами 24 нафар шахсга, жумладан собиқ президент ва ҳукуматнинг беш нафар собиқ аъзосига айблов қўйган. 

Тергов версиясига кўра, Юн Сок Ёль Шимолий Корея томонга дронлар учиришни буюрган. Мақсад жанговар ҳаракатларни қўзғатиш ва бундан Жанубий Кореяда ҳарбий ҳолат жорий этиш учун баҳона сифатида фойдаланиш бўлган. Жанубий Корея дронлари КХДР пойтахти Пхеньян яқинида қулаган. Терговчиларнинг фикрича, Юн ҳарбий маълумотларни узатиш орқали “душманга фойда келтирган”.

2024 йил декабрь ойининг бошида Жанубий Кореяда сиёсий инқироз юзага келган. Бюджет бўйича баҳслар фонида Юн Сок Ёль кутилмаганда мамлакатда ҳарбий ҳолат жорий этилганини эълон қилиб, бу қарорни мухолифатнинг давлатга қарши фаолияти билан изоҳлаган.

Бироқ парламент бу қарорни тасдиқламаган ва эртаси куни давлат раҳбари уни бекор қилишга мажбур бўлган. 2024 йил 14 декабрда депутатлар Юнга импичмент эълон қилган, 2025 йил апрель ойи бошида эса мамлакат Конституциявий суди бу қарорни тасдиқлаган.

Юн Сок Ёль 15 январь куни иккинчи уринишда ҳибсга олинган, биринчи уриниш унинг қўриқчилари қаршилиги сабабли муваффақиятсиз бўлган. Дастлаб суд собиқ президентни қамоққа олишга қарор қилган, бироқ 8 март куни ҳимоя томонининг илтимоси қондирилиб, у озодликка чиқарилган. Шунга қарамай, Юн Сок Ёлга нисбатан тергов ишлари давом этмоқда.

Эслатиб ўтамиз, аввалроқ Юн Сок Ёль ўз ваколатини суиистеъмол қилиш ва душман давлатга, хусусан, Шимолий Кореяга ёрдам берганликда айбланганди.