Собиқ президент пенсияси етмаётганидан шикоят қилди

Польшанинг собиқ президенти Лех Валенса пенсияси камлигидан шикоят қилди. Бу ҳақда у “O2” нашрига берган интервьюсида сўз очди.

1990-1995 йилларда Польша президенти бўлган Валенса президентлик пенсиясини олади. Унинг миқдори амалдаги давлат раҳбари маошининг 75 фоизини ёки жорий курс бўйича ойига тахминан 3770 долларни ташкил этади.

“Пенсиямдан мамнунманми? Агар шундай бўлганида, мен қўзиқорин теришга ёки балиқ овига борган бўлардим, лекин мен ҳали ҳам дунё бўйлаб юриб, ишлаяпман”, дейди Валенса.

У пенсиясининг катта қисмини “яшаш харажатлари, тиббий хизмат ва касбий фаолиятини қўллаб-қувватлаш” учун сарфлашга мажбур эканини тушунтирган.

Президентлик пенсиясидан ташқари, Валенса Ижтимоий суғурта бошқармасидан умумий асосларда яна бир пенсия олиш ҳуқуқига эга, бироқ принципиал равишда уни олмайди.

“Мен 20 йилдан бери бу пенсияни олмайман. Бир тийин ҳам. Чунки Польша – камбағал”, дейди собиқ президент.

Эслатиб ўтамиз, аввалроқ дунёдаги “энг камбағал собиқ президент” сифатида эсланадиган Уругвайнинг собиқ раҳбари (2010-2015) Хосе Мухика 89 ёшида вафот этганди. Мухика ўзининг камтарона турмуш тарзи учун айнан шундай лақаб олган. У президентлик даврида Монтевидео яқинидаги оилавий фермада яшаган ва деярли бутун маошини хайрия ишларига берган. 2014 йилда унга 1987 йилда ишлаб чиқарилган Volkswagen Beetle’ни 1 миллион долларга сотишни таклиф қилишган, бироқ Мухика рад жавобини берган. Сенатдан кетгач, у сенаторнинг нафақасини ҳам рад этган.