Сунъий интеллект компаниялари Пентагонга ёрдам берадиган бўлди

Пентагон 7 та сунъий интеллект компанияси билан келишувга эришганини маълум қилди. Ушбу келишувга кўра, уларнинг илғор технологиялари Мудофаа вазирлигининг махфий тармоқларида қўлланилади. Бу ҳақда Пентагон расмий баёнотида маълум қилинди.

Баёнотда Anthropic номи тилга олинмаган. Сабаби, унинг Пентагон билан сунъий интеллектдан фойдаланиш қоидалари бўйича келишмовчиликлари бор. Жорий йил бошида Пентагон бу компанияни таъминот занжири хавфи деб баҳолаб, унинг технологияларидан фойдаланишни тақиқлаганди. 

Маълумот учун, Anthropic – бу АҚШда жойлашган, сунъий интеллект хавфсизлиги ва тадқиқотларига ихтисослашган етакчи технология компаниясидир. Унга собиқ OpenAI ходимлари томонидан асос солинган бўлиб, асосий эътиборни хавфсиз ва ишончли СИ тизимларини яратишга қаратган.

SpaceX, OpenAI, Google, NVIDIA, Microsoft ва Amazon веб хизматлари каби компаниялар (уларнинг айримлари аввалдан ҳамкорлик қилиб келган) Пентагоннинг “Impact Level 6” ва 7 даражали махфий тармоқларига интеграция қилинади. Бу эса, ҳарбийларга ушбу технологиялардан кенгроқ фойдаланиш имконини беради.

Баёнотда Пентагоннинг асосий сунъий интеллект платформаси “GenAI.mil” беш ой ичида 1,3 миллиондан ортиқ Мудофаа вазирлиги ходимлари томонидан ишлатилгани айтилди. Google эса, аллақачон Пентагон билан ҳамкорлик қиляпти. У ўзининг сунъий интеллект моделларини махфий ишлар учун қўллаш бўйича янги келишув имзолаган.

Мудофаа вазирлигининг технология бўйича раҳбари Эмил Майкл Anthropic ҳали ҳам хавф сифатида баҳоланаётганини айтган. Бироқ у компаниянинг “Mythos” номли илғор кибер имкониятларга эга модели алоҳида миллий хавфсизлик масаласига айланганини таъкидлаган. Доналъд Трамп эса, ўтган ҳафта Anthropic компанияси яхшиланиб бораётганини айтган ва келажакда унинг Пентагон томонидан қора рўйхатдан чиқарилиши мумкинлигига ишора қилган.

Эслатиб ўтамиз, аввалроқ Ислом инқилоби қўриқчилари корпуси (ИИҚК) Apple, Google, Microsoft ва бошқа Америка технологик компанияларини Исроил ва АҚШ ҳужумларига кўмаклашишда айблаб, Яқин Шарқдаги офисларига зарба бериш билан таҳдид қилган эди. 

Ойбек Рустамов