Таиланд ва Камбоджа ўт очишни тўхтатишга келишиб олди

Таиланд ва Камбоджа икки давлат чегарасида 20 кун давом этган шиддатли жанглардан сўнг ўт очишни тўхтатиш режими қайта тикланиши ҳақида қўшма баёнот имзолади. Бу ҳақда воқеа жойидан Таиланд давлат телеканали Thai PBS хабар берди.

Таиланд Мудофаа вазири Наттхапхон Накпханит ва Камбоджа Мудофаа вазири Теа Сейха 27 декабрдан бошлаб ўт очишни тўхтатиш режими қайта жорий этилишини назарда тутувчи ҳужжатни имзолади.

Таиланд ва Камбоджа чегарасида оғир ҳарбий техника, артиллерия ва авиация қўлланган қуролли тўқнашувлар 7 декабрь куни қайта бошланган эди. Таиланд Қуролли кучлари маълумотига кўра, 22 декабрь ҳолатига 22 нафар ҳарбий ҳалок бўлган, 120 дан ортиқ киши яраланган. Камбоджа расмийлари эса 30 нафар тинч аҳоли вафот этгани ва 87 киши жароҳат олганини маълум қилган. Чегара ҳудудларида ҳар икки томондан 400 мингдан ортиқ одам уй-жойини тарк этишга мажбур бўлган.

Таиланд ва Камбоджа ўртасидаги ҳудудий низолар ўз илдизини Франция мустамлакаси бўлган Ҳиндихитой даврларидан олади. Сиам қироллиги (ҳозирги Таиланд) билан чегараларни белгилаш ишлари 1907 йилда якунланган, бироқ айрим ҳудудлар етиб бориш қийинлиги сабаб комиссия эътиборидан четда қолган. Камбоджа 1953 йилда Франциядан мустақилликка эришгандан сўнг, айнан шу ҳудудлар тортишув мавзусига айланган.

Эслатиб ўтамиз, 26 октябрь куни Таиланд ва Камбожа раҳбарлари АҚШ Президенти Дональд Трамп иштирокида кенгайтирилган отишмани тўхтатиш келишувига имзо чеккагди.