Теҳрондаги тартибсизликларда полиция ходими пичоқлаб ўлдирилди 

Бугун, 8 январь куни Эрон пойтахти Теҳрон яқинида яшаш харажатларининг ортиши  билан боғлиқ норозиликлар вақтида  полиция ходими пичоқлаб ўлдирилди. Бу ҳақда “The Daily Star” нашри маҳаллий ОАВга таяниб хабар берди.  

Қайд этилишича, Малард туманида хизмат олиб борган полиция ходими подполковник Шаҳин Деҳган тартибсизликни назорат қилиш ҳаракатлари вақтида пичоқлаб ўлдирилган.  Ҳозирда жиноятчилар шахсини аниқлаш бўйича ишлар олиб борилмоқда. 

Норозиликлар 28 декабрь куни Теҳронда савдогарлар инфляция ва Эрон риалининг кескин тушиб кетишига қарши намойишга чиққач бошланган ва бошқа шаҳарларга ҳам тарқалган. Мамлакат бўйлаб норозилик намойишлари бошланганига бугун 12 кун тўлди.

AFP агентлигининг расмий баёнотлари ва маҳаллий ОАВ маълумотларига кўра, намойишлар Эроннинг 31 вилоятидан 25 тасига тарқалган ва бир неча ўнлаб одамлар, жумладан хавфсизлик ходимлари ҳам ҳалок бўлган. 

Эслатиб ўтамиз, аввалроқ Лордегон шаҳрида ҳам тўқнашувлар оқибатида икки киши ҳалок бўлиб, 30 га яқин киши жароҳатланганди.