Тер Штеген “Барселона”ни тарк этмоқчи

Германия терма жамоаси ва “Барселона” клуби дарвозабони Марк-Андре тер Штеген Жаҳон чемпионатида иштирок этиш учун ўйин амалиётини излаб, қишки трансфер ойнасида жамоасини ўзгартиришга қарор қилган. Бу ҳақда SPORT нашри хабар берди.

Манбага кўра, 33 ёшли дарвозабон “Барселона”ни тарк этиш қарорини аллақачон қабул қилган. Дарвозабон белидаги жароҳат деярли тузалган ва яқин кунларда машғулотларга қайтиши кутилмоқда. Клуб шифокорлари унинг тикланиш жараёни яхши кечаётганини тасдиқлашган.

Германия терма жамоаси мураббийи Юлиан Нагельсман ва Германия футбол иттифоқи спорт директори Руди Фёллер унинг Жаҳон чемпионатида ўйнаши учун мунтазам ўйин амалиёти зарурлигини очиқ айтишган. Бу эса футболчининг якуний қарорига сабаб бўлиши мумкин.

Тер Штегеннинг ҳолатидан “Ньюкасл”, “Тоттенхэм”, “Манчестер Юнайтед” ва “Монако” каби клублар жиддий қизиқиш билдирмоқда. Улар дарвозабоннинг жисмоний тайёргарлиги ва трансфер қиймати билан қизиқишмоқда.

Тер Штеген “Барселона”ни тарк этишга қатъий қарор қилган. У жамоанинг ҳозирги таркибида Жоан Гарсия ва Войцех Щенсный билан рақобатда етарли ўйин вақти ололмаслигини тушунган. Шу боис, у қишки трансфер ойнаси очилиши билан янги клубга ўтишни режалаштирмоқда.

Маълумот учун, немис дарвозабонининг “Барселона” билан шартномаси 2028 йилгача мўлжалланган. Шунинг учун унинг кетиши тўлиқ трансфер ёки ижара шаклида амалга ошиши мумкин. Каталонияликлар эса унга январда кетиш учун рухсат беришга тайёр.