TikTok АҚШ назоратига ўтади: Трамп тегишли фармонни имзолади

АҚШ Президенти Дональд Трамп TikTok бўйича битимга оид фармонни имзолади. Шу орқали компания Америка корпорациялари назоратига ўтади ва мамлакат ҳудудида фаолиятини давом эттира олади. Ҳужжатни имзолаш жараёни Оқ уй томонидан жонли эфирда намойиш этилди.

Компания 14 миллиард долларга баҳоланди. АҚШ вице-президенти Жей Ди Вэнснинг айтишича, TikTok энди америкаликларга қарши “тарғибот қуроли” сифатида ишлатилмайди.

“Биз америкаликларнинг маълумотлар махфийлигини қонунда белгиланганидек ҳимоя қилаётганимизга ишонч ҳосил қилишни истадик. Биз бунга эришдик. Албатта, бунинг устида ишлашда давом этамиз. Аммо ушбу битим америкаликлар TikTok’дан аввалгидан кўра кўпроқ ишонч билан фойдаланиши мумкинлигини англатади”, дейди Вэнс.

“Reuters” манбасига кўра, битим қуйидагиларни ўз ичига олади: АҚШдаги фойдаланувчиларнинг барча маълумотлари Oracle бошқарувидаги маҳаллий тизимда сақланади, TikTok алгоритми эса ҳимояланади, қайта ўқитилади ва ByteDance назоратисиз АҚШда ишлайди.

Эслатиб ўтамиз, аввалроқ Трамп АҚШ ёшлари “жуда сақлаб қолишни хоҳлаган” бир компания борасида келишувга эришилганини билдирганди. АҚШ Президенти “Fox News”га берган интервьюсида бу битимда инвестор сифатида миллиардерлардан Ларри Эллисон, Майкл Делл ва Мердоклар оиласи иштирок этаётганини айтиб, “катта сумма” ҳақида гапирган.

Жорий йилнинг 16 сентябрь куни эса Трамп январдан бери тўртинчи марта TikTok’ни блоклаш муддатини чўзди. АҚШ ҳукумати илова Хитой компанияси назоратида бўлгани учун уни миллий хавфсизликка таҳдид деб баҳолаганди.