Тинчлик режаси Украина иштирокида тасдиқланади – Кўнгиллилар коалицияси

Кеча, 25 ноябрь куни Кўнгиллилар коалициясининг онлайн йиғилиши бўлиб ўтди ва унга Франция Президенти Эммануэль Макрон, Буюк Британия Бош вазири Кир Стармер ва Германия канцлери Фридрих Мерц раислик қилди. Бу ҳақда Буюк Британия ҳукуматининг расмий сайтида эълон қилинди.

Йиғилишда Украина Президенти Владимир Зеленский, коалицияга аъзо 35 мамлакат раҳбарлари ва вакиллари, Европа Кенгаши Президенти, Европа Комиссияси Президенти ва НАТО Бош котиби иштирок этган.

Шунингдек, йиғилишда АҚШ Давлат котиби Марко Рубио ҳам қатнашган. Президент Зеленский ва Давлат котиби Рубио 23 ноябрда Женевада бўлиб ўтган тинчлик музокаралари ҳақида иштирокчиларга маълумот берган.

Етакчилар Украина ва халқининг ҳақли бўлган адолатли ва барқарор тинчликни қўллаб-қувватлашда қатъий эканини билдирган. Улар Россиянинг амалга оширган ва ошираётган кенг кўламли ва ҳалокатли ҳужумларини қоралаган. Бу ҳужумларда уй-жойлар ва иншоотлар зарар кўрган. Етакчилар жабрланганларга таъзия билдирган.

Улар Президент Трампнинг урушни тўхтатишга қаратилган саъй-ҳаракатларини қўллаб-қувватлашини яна бир бор таъкидлаган ва ҳар қандай ечимда тўлиқ Украинани жалб қилиш, унинг суверенитетини сақлаш, сулҳ БМТ Низоми тамойилларига мувофиқ бўлиши ва узоқ муддатли хавфсизликни кафолатлаши кераклиги таъкидланган. Шунингдек, чегаралар мажбурлаш йўли билан ўзгартирилмаслиги муҳимлиги қайд этилган. Бу тамойил Европа ва ундан ташқарида барқарорлик ва тинчликни сақлашнинг асосий шартларидан биридир.

Улар АҚШ ва Украина ўртасидаги Женевадаги музокаралар муҳим ютуқ бўлганини, икки томон ҳам бу жараённи муҳим қадам сифатида баҳолаганини айтган.

Етакчилар Европа ва НАТО манфаатларига оид масалалар алоҳида, тўлиқ Европа ҳамкорлари ва НАТО иттифоқчилари иштирокида муҳокама қилинишини билдирган. Улар Украинага узоқ муддатли молиявий ёрдамни, шу жумладан музлатилган Россия активларининг тўлиқ қийматидан фойдаланишни тезкор ҳал этиш муҳимлигини таъкидлаган.

Шунингдек, адолатли ва барқарор тинчлик учун Украинага кучли ва ишончли хавфсизлик кафолатлари зарурлиги, шунда келажакдаги ҳар қандай тажовузнинг олди олиниши кераклиги қайд этилган.

Етакчилар, шунингдек, Украина билан молиявий ва ҳарбий ёрдамни мустаҳкамлаш, Россия ва унинг уруш машинасига босимни давом эттиришга қатъий қарор қилган. 

Эслатиб ўтамиз, аввалроқ Россия ва Украина ўртасидаги можарони тугатишга қаратилган АҚШ режаси Женевадаги музокараларда қайта кўриб чиқилганди. Ҳужжат 28 банддан 19 бандга камайтирилган. Швейцариядаги музокаралардан сўнг янгиланган тинчлик режасидан АҚШ ва Россия ўртасидаги, Украина можаросига бевосита алоқаси бўлмаган муносабатларга оид бандлар чиқариб ташланган.