Тоғ-кон саноати ва геология вазирига биринчи ўринбосар тайинланди

Феруза Ҳамидова Рустамовна Тоғ-кон саноати ва геология вазирининг биринчи ўринбосари лавозимига тайинланди. Бу ҳақда вазирлик матбуот хизмати хабар берди.

Қайд этилишича, жорий йилнинг 5 сентябрь куни Тоғ-кон саноати ва геология вазири Бобур Исломов раҳбарлигида марказий аппарат департаменти, бошқарма, бўлимлар бошлиқлари, тизимости корхона ҳамда ташкилотлар раҳбарлари иштирокида видеоселектор йиғилиши бўлиб ўтган.

Вазир соҳада амалга оширилаётган ислоҳотлар, инвестиция лойиҳалари, илмий изланишлар, трансформация ва рақамлаштириш жараёнларининг жадал олиб борилаётганини қайд этган.

Йиғилишда Феруза Рустамовна Ҳамидованинг Тоғ-кон саноати ва геология вазирининг биринчи ўринбосари лавозимига тайинлангани эълон қилинган. Шунингдек, Омонулла Забиҳуллаевич Насриддинхўжаев бошқа ишга ўтиши муносабати билан ушбу лавозимдан озод этилган.

Маълумот учун, Феруза Ҳамидова 2000 йилда Тошкент молия институтини битирган. Бунгача Олмалиқ кон-металлургия комбинатининг Тошкентдаги ваколатхонасини бошқарган ва Комбинат бошқарув раисининг иқтисодиёт ва молия бўйича ўринбосари лавозимида ишлаган. Шунингдек, у “Ўзсаноатқурилишбанк” кузатув кенгашида бўлиб, у ерда кредит операциялари департаментига ҳам бошчилик қилган.

Эслатиб ўтамиз, аввалроқ Президентнинг тегишли қарорига кўра, Алишер Шукруллаевич Бобоев Соғлиқни сақлаш вазирининг биринчи ўринбосари этиб тайинланганди.