Тошкент метросининг 13 та бекатида кассалар ёпилади

Тошкент метросида нақд пул кўринишидаги тўловлар кескин камайган. Шу сабали пойтахтнинг 13 метро бекатидаги кассалар ёпилади. Бу ҳақда Метрополитен маъмурияти хабар берди. 

Қайд этилишича, авваллари метро йўловчиларининг 45-50 фоизи QR-кодли бир марталик чипталардан фойдаланар эди. Ҳозир эса бу кўрсаткич 6-7 фоизни ташкил қилмоқда.

Маълум қилинишича, кассаларда чипталар хариди бўйича узоқ муддатли кузатув таҳлиллари олиб борилган. Кузатув хулосасига кўра, “Мирзо Улуғбек”, “Халқлар дўстлиги”, “Пахтакор”, “Ҳамид Олимжон”, “Пушкин”, “Дўстлик”, “Тошкент”, “Ойбек”, “Тинчлик”, “Шаҳристон”, “Бодомзор”, “Минор” ва “Абдулла Қодирий” бекатларида 1 тадан вестибюль кассасини ёпишга қарор қилинган.

Билдирилишича, ёпилган кассалар ўрнида автоматлаштирилган чипта банкоматлари синов тариқасида ўрнатилмоқда. Шунингдек, йўловчилар ушбу вестибюлларда ҳам банк карталари, мобил иловалар, кафт орқали ва бошқа электрон тўлов усуллари орқали тўловни амалга оширишлари мумкин бўлади.

Эслатиб ўтамиз, жорий йил 1 январдан Тошкент шаҳрининг жамоат транспорти йўналишларида (автобус ва метрополитен) нақд пулдаги йўлкира ҳақи ошганди. Унга кўра, бир йўловчи қатнови учун чекланган тариф – 3 000 (уч минг) сўм. Бунда, бир йўловчи қатнови учун 1 (бир) марталик тўловни электрон тўлов тизими орқали амалга оширилганда рағбатлантирувчи чегирма қўлланилган ҳолда – 1 700 (бир минг етти юз) сўм ундирилиши белгиланган эди.

Дилшод Ҳакимов