Тошкентда 18 ёшли ҳамкасбига шаҳвоний шилқимлик қилган йигит қамалди

Тошкент шаҳрида ўзи билан бир жойда ишлайдиган 18 ёшли қизга жинсий аъзосини видеога олиб ташлаган 20 ёшли йигит 5 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, жорий йилнинг 12 октябрь куни 2005 йилда туғилган Б.Д. ўзи билан бирга ишлайдиган 2007 йилда туғилган Ш.А. га жинсий аъзосини видеога олиб, Telegram орқали юборган. Бундан ташқари, Б.Д. Ш.А. га турли уятли сўзлар ёзиб, жинсий алоқа қилишга ундаган ва шаҳвоний шилқимлик қилган. Ш.А. нинг онаси қизининг телефонини текширганда ҳолатдан хабар топган ва судга даъво аризаси билан мурожаат қилган.

Кеча, 30 октябрь куни Жиноят ишлари бўйича Миробод туман судида мазкур иш кўриб чиқилган. Судда Б.Д. айбига иқрор бўлган ва суддан енгиллик беришни сўраган. У Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисмида кўрсатилган ҳуқуқбузарликни содир этишда айбдор деб топилган ва 5 сутка маъмурий қамоқ жазоси тайинланган.

Эслатиб ўтамиз, аввалроқ Тошкент шаҳар Янгиҳаёт туманида аёл ва унинг жиянига шаҳвоний шилқимлик қилган эркак 5 суткага қамалганди.