Тошкентда 3 млн доллар кредит олиб бермоқчи бўлганлар ушланди

Тошкент шаҳрида 3 млн АҚШ доллари миқдорида кредит олиб бермоқчи бўлган шахслар қўлга тушди. Бу ҳақда Давлат хавфсизлик хизмати хабар берди.

Қайд этилишича, Тошкент шаҳрида савдо фаолияти билан шуғулланувчи МЧЖ раҳбари, муқаддам судланган 1979 йилда туғилган аёл Тошкент вилояти Қибрай туманида яшовчи фуқаронинг ишончига кириб, мансабдор танишлари орқали акциядорлик тижорат банклардан биридан 3 млн АҚШ доллари миқдорида мақсадсиз кредит олиб беришни ваъда қилган ва эвазига кредитнинг 33 фоизини, яъни 990 минг АҚШ доллари талаб қилган. 

ДХХнинг Тошкент вилояти бўйича бошқармаси ҳамда Иқтисодий жиноятларга қарши курашиш департаменти ҳамкорлигида ўтказилган тезкор тадбирда мазкур шахс олдиндан 150 минг АҚШ доллари олган вақтида ашёвий далиллар билан ушланган. 

Тезкор тадбир давомида фуқарога гўёки ўзини банк ходими сифатида таништириб, унга кредит маблағини ажратиб беришни ваъда қилган мазкур ноқонуний келишувнинг бош ташкилотчиси – Урганч шаҳрида яшовчи 1983 йилда туғилган шахс ҳам процессуал тартибда ушланган. 

Билдирилишича, ҳозирда мазкур шахсларга нисбатан Жиноят кодексининг 168-моддаси (Фирибгарлик) 4-қисми “а” банди ва 28,211-моддаси (Пора бериш) 3-қисми “а” банди билан жиноят иши қўзғатилиб, қамоқ эҳтиёт чораси қўлланилган. Тергов ҳаракатлари олиб борилмоқда.

Эслатиб ўтамиз, аввалроқ Андижон вилоятида танишлари орқали 100 минг доллар миқдорида кредит ажратиб беришни ваъда қилган фуқаро қўлга тушганди.