Тошкентда касб-ҳунар техникуми ўқувчиси аёвсиз калтакланди (видео)

Ижтимоий тармоқларда Тошкент шаҳар Мирзо Улуғбек туманидаги касб-ҳунар техникумиларидан бирида ногиронлиги бўлган бола аёвсиз калтаклангани ҳақида хабарлар тарқалди. Уларга илова қилинган суратларда боланинг кўзлари ва юзи, шунингдек, танасининг турли қисмлари кўкариб кетгани акс этган. QALAMPIR.UZ ҳолатга аниқлик киритиш мақсадида Олий Мажлисининг Бола ҳуқуқлари бўйича вакили Сурайё Раҳмонова билан боғланди.

Унинг билдиришича, Болалар омбудсманига 1985 йилда туғилган аёл Х.Г.нинг мурожаати тушган. Унга кўра, жорий йилнинг сентябрь ойи давомида Тошкент шаҳар Мирзо Улуғбек туманида жойлашган касб-ҳунар техникумида таҳсил олаётган 2-гуруҳ ногиронлиги бўлган вояга етмаган фарзанди Р.Ф.га нисбатан мазкур муассасада турли жисмоний зуравонлик содир қилинган. 

Ҳозирда Болалар омбудсмани боланинг онаси билан боғланган. Ҳолат юзасидан ИИБ органлари томонидан терговга қадар текширув харакатлари олиб борилмокда. Болага етказилган жароҳатлар бўйича суд-тиббиёт экспертизаси тайинланган. Болалар омбудсмани ҳолат юзасидан ўз кузатувини давом эттиради. Бу борада қўшимча маълумот берилади.

Шунингдек, мазкур воқеани ҳар томонлама ва холисона ўрганиш мақсадида Ижтимоий ҳимоя миллий агентлиги томонидан зудлик билан махсус ишчи гуруҳ тузилган. Ишчи гуруҳ воқеа жойига чиқиб, воқеанинг келиб чиқиш сабаблари ва тафсилотларини батафсил ўрганмоқда.

Эслатиб ўтамиз, аввалроқ Сурхондарё вилоятининг Термиз шаҳрида 1980 йилда туғилган аёл 2022 йилда туғилган невараси ва шу ерда ўйнаётган 2017 йилда туғилган бошқа бир боланинг ўзаро жанжалига аралашиб, 8 ёшли боланинг юз қисмига қўли билан бир неча маротаба уриб, калтаклаган эди.