Трамп Ҳормуз бўғозида янги операция бошлади

АҚШ Президенти Дональд Трамп ташаббуси билан Ҳормуз бўғозида қолиб кетган кемаларни чиқариш операцияси бошланади. Бу ҳақда Оқ уй раҳбари ўзининг Truth social тармоғида ёзиб қолдирди.

Трамп тармоқда қилган баёнотида, нейтрал давлатларга тегишли кемалар бўғоздан чиқиб кетиши учун Америка уларни кузатиб боришини маълум қилди. “Project Freedom” (“Озодлик лойиҳаси”) деб номланган операция бугун, 4 май куни эрталаб бошланди.

Трампнинг айтишича, бу кемалар Яқин Шарқдаги можарога умуман алоқадор эмас. Улар “оддий, айбсиз ва нейтрал кузатувчилар” бўлиб, юзага келган вазият қурбонига айланган.

Президентнинг таъкидлашича, операция учинчи давлатларнинг мурожаатларидан сўнг бошланган. Улар ўз кемаларини блокададан чиқаришда ёрдам сўраган. Трамп бу ҳаракатни АҚШ, минтақа давлатлари ва қисман Эрон томонидан амалга оширилаётган “гуманитар қадам” деб атаган.

Унинг сўзларига кўра, кўплаб кемаларда озиқ-овқат ва зарур воситалар тугаб бормоқда. Шу сабабли экипажлар учун хавф кучайган.

“Чиқарилган кемалар ҳудуд хавфсиз бўлмагунча Ҳормуз бўғозига қайтмайди. Агар операцияга тўсқинлик қилинса, АҚШ бунга куч билан жавоб бериши мумкин”, деган Трамп.

Бироқ Эрон томони бу ташаббусга эҳтиёткорлик билан муносабат билдирган. Эрон парламентининг миллий хавфсизлик қўмитаси раҳбари Иброҳим Асисий АҚШ аралашуви ўт очишни тўхтатиш режимини бузиш сифатида баҳоланиши мумкинлигини огоҳлантирган.

Эслатиб ўтамиз, Эрон АҚШга урушни якунлаш бўйича янги – 14 банддан иборат режа юборган эди. Айрим маълумотларга кўра, бу режа уч босқични ўз ичига олади: аввало ўт очишни тўхтатиш, кейин музокаралар орқали узоқ муддатли келишувга эришиш.

Кейинчалик, АҚШ Президенти Дональд Трамп Эрон томонидан таклиф қилинган уч босқичли тинчлик режасини рад этган.