Трамп баъзи ОАВларнинг лицензияларини бекор қилишни талаб қилди

АҚШ Президенти Дональд Трамп мамлакатдаги ABC ва NBC телеканалларини кескин танқид қилиб, уларни “сохта янгиликлар тарқатувчи, тарихдаги энг ёмон ва энг тарафкаш каналлар” деб атади. Бу ҳақда у ўзининг Truth Social тармоғида ёзиб қолдирди. 

У ижтимоий тармоқдаги чиқишида ушбу телеканаллар унинг президентлиги ҳақида асосан салбий материаллар эълон қилиши, хусусан 97 фоиз хабарларида уни ёмон кўрсатишини таъкидлаган. Трампнинг фикрича, улар амалда “Демократик партиянинг бўлими сифатида” фаолият юритмоқда.

Шу боис, у АҚШ Федерал алоқа комиссиясидан (FCC) ушбу телеканаллар лицензиясини бекор қилишни талаб қилган. Трамп уларнинг фаолиятини “демократияга хавф” деб баҳолаган.

Шунингдек, Трамп бу телеканаллар лицензия тўловларини тўламаётгани, аслида улар миллионлаб доллар тўлаши кераклигини айтган. 

“Агар республикачиларни ҳамда консерваторларни адолатсиз ёритишда давом этса, улар лицензияларидан маҳрум бўлиши лозим”, деган Оқ уй раҳбари. 

Трампнинг ОАВ билан можаролари бундан аввал ҳам кўп бўлган. 2024 йилда у ABC News ва журналист Жорж Стефанопулосга қарши судга мурожаат қилган. Суд жараёнидан сўнг ABC News ва Стефанопулос 15 миллион доллар тўлаб, келишувга эришган.

Ўша йилнинг ноябрида Трамп CBS телеканалига 10 миллиард долларлик даъво қўзғатган. У CBS’ни “хабарлар билан манипуляция қилганликда” айблаган.
2025 йилнинг апрелида Трамп CBS’ни яна танқид қилиб, Украина ва Гренландия ҳақида кўрсатилган дастурларидан сўнг унинг ҳам лицензияси бекор қилиниши кераклигини айтган.

Эслатиб ўтамиз, жорий йилнинг 14 март куни АҚШ Президенти Дональд Трамп еттита федерал агентликдаги ходимларни кенг кўламли қисқартириш тўғрисидаги фармонни имзолаганди. Улар орасида “Озодлик радиоси” фаолиятини назорат қилувчи АҚШ Глобал медиа агентлиги (USAGM) ва “Америка овози” ҳам бор эди.