Трамп Эрдўғанга Ғазо Тинчлик кенгаши масаласида мактуб йўллади

АҚШ Президенти Дональд Трамп Туркия Президенти Ражаб Тойиб Эрдўғанни Ғазо секторини тиклаш ва унинг хавфсизлигини таъминлаш учун масъул бўладиган Тинчлик кенгашининг таъсисчиларидан бири бўлишга таклиф қилди. Бу ҳақда Туркия Президенти администрациясининг Ахборот алоқалари бошқармаси раҳбари Бурхониддин Дуран маълум қилди.

Унинг ёзишича, БМТ Хавфсизлик Кенгаши 2803-резолюция орқали Дональд Трамп томонидан эълон қилинган Ғазодаги можарони тўхтатиш бўйича комплекс режани қўллаб-қувватлаш тўғрисида қарор қабул қилган. Мазкур қарор доирасида Ғазо секторида хавфсизликни таъминлаш ва уни қайта тиклаш билан шуғулланадиган Тинчлик кенгаши ҳамда унинг тегишли тузилмалари ташкил этилмоқда.

Шунингдек, Бурхониддин Дуран кеча, 16 январь куни АҚШ Президенти Дональд Трамп Тинчлик кенгашининг таъсисчиси ва раиси сифатида Ражаб Тойиб Эрдўғанга ушбу кенгашнинг таъсисчи аъзоларидан бири бўлиш таклифи билан расмий мактуб йўллаганини қайд этган. 

Эслатиб ўтамиз, аввалроқ АҚШ Ғазони бошқариш бўйича Миллий кенгаш ташкил этилганини эълон қилиб, Ғазо сектори бўйича АҚШ тинчлик ташаббусини амалга ошириш билан шуғулланадиган халқаро Тинчлик кенгаши таркибини маълум қилган эди.