Трамп Эрон билан музокаралардан бош тортди

АҚШ Президенти Дональд Трамп Эрон билан музокаралар бошлаш бўйича Яқин Шарқ давлатлари таклифларини рад этди. Бу ҳақда “Reuters” агентлиги хабар берди.

Агентликнинг маълум қилишича, Оқ уй нинг юқори лавозимли амалдори Трамп барча музокара ташаббусларини рад этганини ва асосий эътиборни Эроннинг ҳарбий салоҳиятини янада заифлаштириш мақсадида урушни давом эттиришга қаратганини тасдиқлаган.

Шу билан бирга, икки нафар юқори лавозимли эронлик амалдор нашрга Эрон АҚШ ва Исроил зарбалари тўхтамагунча ўт очишни тўхтатишга рози бўлмаслигини билдирган. Уларга кўра, можарони ҳал қилиш учун бир неча давлатлар воситачилик қилишга уриниб кўрган.

Манбалар маълумотига кўра, музокараларда аввал ҳам воситачилик қилган Уммон бир неча бор томонлар ўртасида мулоқотни тиклашга ҳаракат қилган. Бироқ Оқ уй бундай ташаббусга қизиқиш билдирмаган.

Эронлик манбанинг айтишича, мамлакатнинг хавфсизлик масалалари бўйича бош вакили Али Ларижоний ва Ташқи ишлар вазири Аббос Ароқчи ҳам Уммон орқали ўт очишни тўхтатиш бўйича музокараларни ташкил этишга уринган. Ушбу музокараларда Жей Ди Вэнс иштирок этиши мумкин эди, бироқ бу учрашувлар амалга ошмаган.

Трамп Эрон билан фақат унинг таслим бўлиши ҳақидаги келишувдан бошқа ҳеч қандай битим тузилмаслигини билдирган. Кейинроқ у “Axios” нашрига берган изоҳида, агар Эрон таслим бўлишини эълон қилса ёки урушни давом эттириш имконияти қолмаса, бундай ҳолат юз бериши мумкинлигини айтган.

АҚШ ва Исроил томонидан Эронга қарши ҳарбий операция февраль ойи охирида бошланган. Можаронинг дастлабки кунларида Оятуллоҳ Али Хоманаий ҳалок бўлгани хабар қилинган.

Маълум қилинишича, Эрон ядровий дастури бўйича АҚШ билан сўнгги музокаралар 26 февраль куни Женева шаҳрида бўлиб ўтган. Бу учрашувдан кўп ўтмай АҚШ ва Исроил Эрон га қарши ҳарбий операция бошлаган.

Эслатиб ўтамиз, аввалроқ “Катта еттилик” мамлакатларининг етакчилари ҳам Трампни Эрон урушини тезроқ тугатишга чақирганди.