Трамп Қатар билан 1,2 трлн долларлик битим имзолади

Кеча, 14 май куни АҚШ Президенти Дональд Трамп ва Қатар ҳукумати ўртасида 1,2 триллион доллардан ортиқ қийматга эга иқтисодий ҳамкорлик тўғрисидаги шартнома имзоланди. Бу ҳақда Оқ уй баёнот берди.

“Бугун Қатарда Президент Дональд Трамп Қатарнинг камида 1,2 триллион долларлик иқтисодий алмашинуви ҳақида келишувга имзо чекди”, дейилади баёнотда.

Битим доирасида Қатар АҚШдан 210 дона Boeing 787 Dreamliner ва 777X самолётлари харид қилади. Уларнинг умумий қиймати 96 миллиард долларни ташкил этади. Қатар шунингдек, MQ-9 Reaper разведка ва ҳужумга мўлжалланган дронларини қарийб 2 миллиард долларга сотиб олади. Raytheon FS-LIDS (Fixed Site – Low, Slow, Small Unmanned Aerial System Integrated Defeat System) – кичик, секин ва паст баландликдаги дронларга қарши мўлжалланган тизимлар илк бор Қатарга экспорт қилинади. Бу келишувнинг қиймати 1 миллиард долларни ташкил қилади.

Бунгача Оқ уй матбуот котиби Кэролайн Ливиттнинг Қатар ҳукумати Boeing 747-8 самолётини АҚШ Мудофаа вазирлигига фойдаланиш учун топширишни таклиф қилгани, аммо бу таклиф ҳали ҳуқуқий келишув босқичида эканини айтган. Трамп эса бу таклифни рад этиш “аҳмоқлик бўлар эди”, дея изоҳ берган.

Бу битим Қатар ва АҚШ ўртасидаги энг йирик иқтисодий келишувлардан бири ҳисобланади.

Эслатиб ўтамиз, айни дамда Трамп Яқин Шарққа ташриф буюрган. АҚШ Президенти ҳозиргача мазкур ташриф давомида Саудия Арабистони билан АҚШ иқтисодиётига 600 млрд доллар сармоя киритиш бўйича битим имзолади. Шунингдек, Boeing компанияси Қатарга 200 млрд долларлик 160 дан ортиқ самолёт етказиб бериши тўғрисида келишувга эришилди.