Трамп Нетаньяху билан ёпиқ эшиклар ортида учрашди

Кеча, 11 февраль куни АҚШ Президенти Дональд Трамп Оқ уйда Исроил Бош вазири Беньямин Нетаньяху билан учрашди. Бу ҳақда BBС хабар берди.

Учрашув Яқин Шарқда кескинлик кучайган ва Эроннинг ядровий дастури бўйича музокаралар давом этаётган бир пайтда бўлиб ўтган. Нетаньяху Трампни Эроннинг нафақат уранни бойитишини тўхтатиш, балки баллистик ракета дастури ҳамда ҲАМАС ва “Ҳизбуллоҳ” каби гуруҳларни қўллаб-қувватлашини чекловчи кенг қамровли келишувга эришишга ундаган.

Давлат раҳбарлари ўртасидаги мулоқот деярли уч соат давом этган. Дональд Трамп учрашувдан сўнг, ҳеч қандай матбуот анжумани ўтказмаган. Truth Social саҳифасида эса Бош вазир билан бўлган суҳбат “жуда яхши” бўлганини ёзган. Шунингдек, Эрон билан келишувга эришиш энг тўғри вариант эканини, бироқ бундан натижа чиқмаса, бошқа чоралар кўрилишини маълум қилган.

Эрон эса санкциялар енгиллаштирилиши эвазига ядровий дастурини чеклашга тайёрлигини билдирган. Мамлакат Президенти Масъуд Пезешкиён Теҳрон бундан бошқа “ортиқча талабларга бўйсунмаслигини” билдирган.

Нетаньяху идораси икки давлат раҳбари музокаралар доирасида Исроил хавфсизлик масалаларини муҳокама қилганини ва яқин ҳамкорликни давом эттиришга келишиб олганини қайд этган. Бу Нетаньяхунинг Трамп лавозимга қайтганидан бери АҚШга олтинчи ташрифи бўлди. Такидлаш жоизки, айни вақтга келиб АҚШ Яқин Шарқдаги ҳарбий иштирокини янада кучайтирмоқда. Трамп минтақага иккинчи авиаташувчи зарба берувчи гуруҳ юборилиши мумкинлигини маълум қилган. 

Экспертларнинг фикрича, Исроил Эрон билан шошилинч қабул қилинадиган келишувдан хавотирда. Айрим таҳлилчилар Трамп ҳар қандай келишувдан кўра натижага тезроқ эришишни афзал кўришини таъкидлашмоқда. Эрон ҳукумати эса АҚШ томонидан эҳтимолий ҳужум минтақавий урушга олиб келиши мумкинлиги ҳақида огоҳлантирган.

Эслатиб ўтамиз, аввалроқ Исроил АҚШни агар Теҳрон баллистик ракеталар бўйича белгиланган “қизил чизиқ”дан ўтса, Тель-Авив Эронга қарши якка ҳолда ҳарбий зарба беришга тайёрлиги ҳақида огоҳлантирганди.