Трамп Рютте билан АҚШнинг НАТОдан чиқишини муҳокама қилади

АҚШ Президенти Дональд Трамп НАТО бош котиби Марк Рютте билан мамлакатнинг альянсдан чиқиш масаласини муҳокама қилади. Бу ҳақда кеча, 8 апрель куни Оқ уй матбуот котиби Кэролайн Ливитт матбуот анжуманида маълум қилди.

Унинг сўзларига кўра, АҚШнинг НАТО бўйича иттифоқчилари Эрон билан урушда АҚШга ёрдамга бормай, “синовдан ўта олмаган”.

“Шуни қўшимча қилган бўлардимки, сўнгги олти ҳафта ичида айнан Америка халқи уларнинг мудофаасини молиялаштирган бўлса-да, НАТОнинг Америка халқидан юз ўгиргани жуда ачинарли”, дейди Ливитт.

Унинг қўшимча қилишича, Трамп Рютте билан “жуда очиқ ва самимий суҳбат”ни интиқлик билан кутмоқда.

АҚШ ҳали ҳам НАТОдан чиқиш имкониятини кўриб чиқяптими, деган саволга Ливитт: “Президент бу масалани муҳокама қилди ва менимча, у буни бош котиб Рютте билан ҳам муҳокама қилади”, дея жавоб берган.

CNN’нинг қайд этишича, бунинг учун Конгресс НАТОдан чиқишни маъқуллаши керак бўлади, бу эса эҳтимолдан йироқ бўлиб кўринмоқда.

Эслатиб ўтамиз, аввалроқ Дональд Трамп НАТОдан чиқиш масаласини жиддий кўриб чиқаётганини маълум қилганди. Трампга кўра, НАТО давлатлари Эрон билан урушда АҚШни қўллаб-қувватламаган. У альянсни “қоғоз йўлбарслар” деб атаб, ҳатто Владимир Путин ҳам буни билишини таъкидлаган.