Трамп танқидчиларни депортация билан қўрқитди

АҚШ Президенти Дональд Трамп Конгрессдаги мурожаатидан сўнг “Truth social” тармоғида кескин баёнот бериб, айрим танқидчиларини депортация қилиш кераклигини ёзди. У демократ конгрессменлар Илҳан Умар ва Рашида Тлаиб, шунингдек, актёр Роберт ДеНирони нишонга олган. Бу ҳақда “Euronews” ёзди.  

Оскар совриндори Де Ниро мурожаат олдидан ўтган муқобил тадбирда ва телеканал эфирида Трамп “ҳокимиятни ҳеч қачон тарк этмаслиги мумкин” деган фикрни билдириб, америкаликлар уни “четлатиши шарт”лигини айтган. Бундан ташқари, мамлакатдаги сиёсий муҳитни танқид қилиб, ўзини “ватани томонидан хиёнатга учрагандек” ҳис қилаётганини таъкидлаган.

Трамп эса жавобан Де Нирони ҳақоратли сўзлар билан атаб, унинг баёнотлари “жиддий жиноят” эканини айтиб, бир пайтлар актриса РозиО’Доннелл фуқаролигини бекор қилиш билан таҳдид қилганини ҳам эслатган. Бу аёл қайта сайловдан кейин Ирландияга кўчиб ўтган. Манбага кўра, америкаликларнинг 61 фоизи Трамп ёши ўтиши билан “беқарор”лашган деб ҳисоблайди.

“The Washington Post”, ABC News, “Ipsos” тадқиқоти эса унинг фаолиятини маъқулловчилар улуши 39 фоиз атрофида эканини кўрсатган. Оқ уй бу рақамларни “асоссиз ривоят” дея рад этмоқда.

Эслатиб ўтамиз, аввалроқ Дональд Трамп ўзининг яқин сиёсий доираси билан келажакдаги эҳтимолий вориси масаласини муҳокама қилаётгани ҳақида хабар берилган эди.