Трамп Олимпия хоккейи жамоаси билан учрашди (видео)

АҚШ Президенти Дональд Трумп Оқ уйда 2026 йилги қишки Олимпия ўйинлари чемпиони АҚШ Олимпия хоккей жамоаси аъзолари билан учрашди. Бу ҳақда Оқ уй ижтимоий тармоқлардаги расмий саҳифаларида хабар берди.

Учрашувда Трамп жамоанинг ҳозирги асосий дарвозабони Коннор Хеллебайкга давлатнинг энг юқори мукофотларидан бири – Озодлик медали (“Presidential Medal of Freedom”) топширилишини эълон қилган.

Учрашувда терма жамоа рўйхатидаги 25 нафар хоккейчидан 20 нафари иштирок этган. 

Эътиборли жиҳати, йўқ бўлганларнинг тўрт нафари – Нельсон, Лакомб, Генцел ва Эттинджер  яқинда Миннесота штатида Трамп маъмуриятининг иммиграция сиёсатига қарши оммавий норозилик намойишлари бўлиб ўтган жойда туғилган ёки болалигининг катта қисмини шу ерда ўтказган. 

Шу билан бирга, уларнинг учрашувни ўтказиб юбориш қарорига жамоалари томонидан Олимпия танаффусидан кейин биринчи NHL ўйинларини ўтказаётгани ҳам таъсир қилган бўлиши мумкин.

Бу АҚШ хоккейчилари учун 1980 йилдан бери қўлга киритилган биринчи Олимпия олтин медалидир. Ўшанда Қўшма Штатлар Совет Иттифоқи устидан қозонилган ғалаба туфайли турнирда ғолиб бўлган. Бу воқеа спорт оламида “Муз устидаги мўъжиза” номи билан машҳур бўлган ва Голливудда бу ҳақда ҳужжатли фильм ҳам суратга олинган.

Маълумот учун, жорий йилнинг 22 февраль куни Миланда ўтказилган Олимпия хоккей турнирининг финалида АҚШ терма жамоаси Канада терма жамоасини қўшимча вақтда 2:1 ҳисобида мағлуб этиб, Олимпиада чемпионлигини қўлга киритган эди.

Эслатиб ўтамиз, аввалроқ Италиядаги Олимпиадада олтин медални қўлга киритган АҚШ аёллар хоккей жамоаси Президент билан учрашиш таклифини рад этганди.