Царукян Топуриядан кўра жиддийроқ рақиб – Ҳабиб Нурмуҳаммедов

Енгил вазн тоифаси собиқ UFC чемпиони Ҳабиб Нурмуҳаммедов амалдаги тоифа чемпиони Ислом Махачевнинг навбатдаги рақиби ким бўлиши кераклиги ҳақида гапирди. Бу ҳақда “Sports.ru” нашри хабар берди.

Манбага кўра, Нурмуҳаммедовнинг фикрича, айни вақтда Махачевга рақиб бўлиши мумкин бўлган ягона жангчи Арман Царукян. Илия Топурия эса бу вазнда ҳали жанг қилмагани учун, чемпионлик жангига лойиқ эмас.

“Арман Илиядан кўра жиддийроқ жангчи. Топурия ҳали енгил вазн тоифасида бирорта жанг ўтказмаган. Шу сабаб Исломнинг кейинги рақиби Царукян бўлиши керак”, дейди Нурмуҳаммедов.

Маълумот ўрнида, Ислом Махачев ва Арман Царукян жорий йилнинг 18 январида тўқнаш келиши керак эди, аммо жангга бир неча кун қолганида арманистонлик жангчи жароҳат олиб, турнирни тарк этганди. Ўшанда Махачев Арманнинг ўрнини эгаллаган бразилиялик Ренато Мойканога қарши октагонга кўтарилиб, 1-раунддаёқ бўғиш услуби билан ғалаба қозонган эди.