Тўқаев ҳам Москвадаги Ғалаба парадида қатнашади

Қозоғистон Президенти Қосим-Жомарт Тўқаев Иккинчи жаҳон урушидаги Ғалабанинг 81 йиллиги муносабати билан ўтказиладиган тадбирда иштирок этиш учун Москвага боради. Бу ҳақда давлат раҳбарининг матбуот котиби Ойбек Смадияров маълум қилди.

Кремл бўлажак ташрифга муносабат билдириб, уни қозоғистонлик етакчининг дўстона қадами деб атаган.

“Ташриф доирасида Қосим-Жомарт Тўқаевнинг Владимир Путин билан алоҳида учрашуви режалаштирилган. Давлат раҳбарлари май ойи охирига режалаштирилган Россия Президентининг Қозоғистонга ташрифи арафасида стратегик ҳамкорликнинг асосий масалаларини муҳокама қилади”, дейилади манбада.

Аввалроқ, Кремл сайтида Москвадаги парадга таклиф этилган хорижий етакчилар ва юқори мартабали меҳмонларнинг расмий рўйхати эълон қилинган эди. Бироқ ўша рўйхатда Марказий Осиё давлатлари Президентлари йўқ эди. Шу билан бирга, Россия Президентининг ёрдамчиси Юрий Ушаков бу йил Москва 2025 йилдагидек хорижий меҳмонларни махсус таклиф қилмаганини айтганди.

Маълумот учун, кеча, 7 май куни Владимир Путин қозоғистонлик мавқедошини Ғалаба куни билан табриклаган эди.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев амалий ташриф билан Москва шаҳрига жўнаб кетгани ва у ерда Иккинчи жаҳон урушидаги Ғалабанинг 81 йиллиги муносабати билан ўтказиладиган тадбирда иштирок этиши хабар қилинган эди.

Ойбек Рустамов