Тўққиз ёшли бола жаҳон рекордини ўрнатди

9 ёшли Теодор Зайдер Gdansk Speedcubing League мусобақасида кубик-рубикни 2,766 сонияда йиғиб, янги рекорд эгасига айланди. Бу ҳақда “Euro News” хабар берди.

У аввалги рекордни янгилади. Олдинги натижа Хитой вакили Сюаньи Гэнга тегишли бўлиб, у Shenyang Spring 2025 мусобақасида кубикни 3,05 сонияда йиғган эди.

Ёш польяк спортчи бир вақтнинг ўзида миллий рекордни ҳам ўрнатган. У Flatåsen Open 2024 мусобақасида кубикни 3,66 сонияда йиғган Тимон Коласински натижасини ортда қолдирган. 
Кубик-рубикни тезлик билан йиғиш спорт тури “spidkubing” деб аталади. Бу йўналишда профессионал шуғулланишни истаганлар Бутунжаҳон Кубик Ассоциацияси (WCA) таркибига киради. Ушбу ташкилот халқаро спорт уюшмалари каби фаолият юритади.

WCA иштирокчилар учун қоидалар ва тартибларни белгилайди, миллий ассоциациялар кўмагида мусобақалар ва чемпионатлар ташкил этади. Польшада ҳам Spidkubing бўйича Польша Ассоциацияси фаолият юритади.

Маълумот учун, кубик-рубик ўз номини ихтирочисидан олган. Ушбу бошқотирма ўйинчоқ 1974 йилда венгриялик ихтирочи, архитектор ва ҳайкалтарош Эрнё Рубик томонидан яратилган.

Бошқотирма тез орада кенг оммалашди ва у яратувчисининг номи билан аталадиган бўлди. Полшада бу ўйинчоқ “кубик-рубик” деб аталади, ихтирочининг ватани Венгрияда эса у “сеҳрли куб” деб номланади.

Кубик-рубикнинг яратувчиси ҳозиргача Венгрияда яшайди, бироқ ўз ихтироси мухлислари ҳаётида унчалик фаол иштирок этмайди.

Эрнё Рубик кубикни биринчи бўлиб ечган инсон ҳам ҳисобланади. Бунинг учун унга бир ой вақт керак бўлган.