Туркияда бир жамоадан 17 футболчи дисквалификация қилинди

Туркиянинг тўртинчи дивизионидаги “Агри Спор” клуби кеча, 24 ноябрь куни 17 нафар футболчиси кенг тарқалган пул тикиш можароси бўйича дисквалификация қилингани сабабли навбатдаги ўйинда қатнаша олмаслигини маълум қилди. 

“Тергов доирасида 17 нафар ўйинчимиз жазоланди, шунинг учун бизда бор-йўғи етти нафар футболчи қолди”, деб ёзди клуб ижтимоий тармоқлардаги саҳифасида. 

“Агри Спор” Эрон чегарасига яқин Агри шаҳрида жойлашган ва Туркия профессионал футбол лигасининг қуйи лигасида ўйнайди. “Агри Спор” клуби навбатдаги ўйинда иштирок этиш учун ёшлар жамоасини чақиришини маълум қилган.

Туркия футбол федерацияси (ТФФ) 637 нафар тўртинчи тоифадаги ўйинчини футболдан четлатган, шундан сўнг юқори тоифадаги 25 нафар, шунингдек, иккинчи ва учинчи дивизионларда тўп сураётган 350 дан ортиқ футболчилар ҳам жазоланган эди. Шунингдек, ТФФ учинчи ва тўртинчи тоифадаги ўйинларни икки ҳафтага тўхтатиб қўйган ва 149 нафар ҳакамни ноқонуний пул тикиш учун четлатган эди.
Дисквалификация қилинган футболчиларнинг аксарияти бир неча йил олдин ўйинга пул тикканини тан олган, аммо кейин бу одатни тўхтатганини айтиб ўтган. Истанбул бош прокурори эса келишилган ўйинлар бўйича текширувни якунига етказишга ваъда берган.

Эслатиб ўтамиз, аввалроқ ТФФ мамлакатда давом этаётган пул тикиш бўйича тергов доирасида гумонланаётган “Галатасарой” ҳимоячиси Эрен Элмалини миллий терма жамоа таркибидан чиқариб ташлаганини маълум қилган эди.