Туркияда яна бир ўзбекистонлик аёл ўлдирилгани аниқланди

Туркиянинг Истанбул вилояти Молтепа туманида 2019 йилда йўқолган деб қидирувга берилган ўзбекистонлик аёл эри томонидан ўлдирилгани аниқланди. Бу ҳадқа DHA хабар берди.

Маълум қилинишича, 2019 йилда опаси Севара Зоҳидова томонидан қидирувга берилган 36 ёшли марҳума Ҳуррият Турсунбоева эри Эрсин Й. (37 ёш) томонидан ўлдирилиб, чиқиндига ташланган.

Аниқланишича, Эрсин унинг жасадини бир ой давомида яширгач, бўлакларга бўлиб, чиқинди контейнерига ташлаган. Ҳолат юзасидан Эрсин Й. ва воқеадан кейин унга ёрдам берган дўсти Анил Й. қўлга олинган.

Истанбул полиция бошлиғи Селами Йилдиз топшириғи билан эски йўқолганлик ишлари қайта кўриб чиқилиши бошланган. Шу доирада 2019 йилда Ўзбекистон фуқароси Севара Зоҳидова томонидан синглиси Ҳуррият Турсунбоева билан боғлиқ Анадолу Бош прокуратурасига берилган ариза қайта текширилган.

Шундан сўнг полиция Турсунбоеванинг Молтепадаги уйига бориб, қўшнилардан маълумот олган. Қўшнилар ўша пайтда Эрсин Й. хотини депортация қилиниб, ортга юборилгани ҳақида айтганини билдирган. Шу даврда хонадондан ёмон ҳид келиб, Эрсин Й. эса бу ҳидни каптар боқиши билан изоҳлагани аниқланган. Текширувда Турсунбоева мамлакатдан чиқиб кетмагани ва унинг номидаги телефон рақами ўша вақтда Туркияда фаол ҳолатда экани маълум бўлган.

Севара Зохидованинг кўрсатмасига кўра, эр-хотин ўртасида жиддий келишмовчилик бўлган. Эрсин Й. йўқолганлик аризасидан сўнг қисқа вақт ичида “ташлаб кетилдим” деган важ билан ажрашиш даъвоси киритган. Турсунбоева 5 йил давомида даъвога жавоб бермагани сабабли суд ажрашиш қарорини чиқарган.

Тахминан 7 йил ўтиб, эр-хотин яшаган уйда қайта текширув ўтказилган. Ошхона ва балкон қисмларида луминол тести орқали қон реакцияси аниқланган. Маълум бўлишича, Эрсин Й. хотини билан ошхонада жанжаллашган, жанжал пайтида унинг бошига таёқ билан уриб ўлдирган. Сўроқ давомида Эрсин жасадни аввал балконга қўйганини, бир кундан кейин устига қум сепганини, ҳид кетмагач эса оҳак ишлатганини билдирган. Кейинчалик жасадни ошхонага олиб кириб, бўлакларга бўлган ва учта пакетга солиб, уйдан 50 метр узоқликдаги чиқинди контейнерига ташлаган.

Сўнг икки фарзандини дўсти Анил Й. билан Ойдин вилоятидан автобусда Истанбулнинг Гебзе автовокзалига келган оиласига топширган.

Эрсин Й. воқеадан кейин дўсти Анил Й.нинг паспортидан фойдаланиб, турли шаҳар ва давлатларга борган. Бедарак йўқолгани ҳақидаги аризадан сўнг Турсунбоева ва Эрсин Й.га тегишли SIM-карталар алмаштирилган ва телефон тўловлари мунтазам тўлаб келинган.

Жорий йилнинг 9 март куни Грузиядан чиқиб, Артвин вилоятидаги Сарпи чегара пунктидан Туркияга кирган Эрсин Й. ҳамда Истанбулдаги дўсти Анил Й. бир вақтнинг ўзида ўтказилган операцияда қўлга олинган.

Эрсин Й. жиноят сабабини тушунтирар экан, хотинининг опаси Севара Зоҳидова унга хотининг собиқ севгилиси билан акс этган шахсий суратларини юборганини, шунингдек, хотини оилали бўла туриб собиқ севгилиси билан учрашиб юрганини даъво қилган. Шу сабабли улар ўртасида бошланган тортишув жанжалга айланган ва оқибатда у жиноят содир этган.

Бошқа гумондор Анил Й. эса жиноятдан хабари йўқлигини, фақат шахсий гувоҳномасини берганини ва болаларни олиб боришда ёрдам берганини айтган. Сўроқдан сўнг Эрсин Й. прокурор ҳузурида жасад ташланган жойни кўрсатган.

Полициядаги текширув якунлангач, Эрсин Й. ва Анил Й. Анадолу судига топширилган.

Туркиядаги ўзбекистонлик аёллар билан боғлиқ жиноятлар

Аввалроқ, Туркиянинг Баликесир вилоятидан 46 ёшли Дилафрўз Чўлиеванинг жасади топилиб, Ўзбекистонга қайтарилганди. Мазкур жиноятни содир этишда гумонланиб 4 нафар шахс қўлга олинган бўлиб, ҳозирги вақтда тергов ҳаракатлари давом этмоқда.

Шунингдек, олдинроқ Туркиянинг Истанбул шаҳри Шишли туманида чиқинди йиғувчи томонидан ахлат контейнеридан ўзбекистонлик Дурдона Ҳакимованинг жасади топилган эди.

Кейинроқ мазкур иш доирасида у ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди.

Бундан ташқари, Туркиянинг Истанбул шаҳрида ўзбекистонлик аёл озарбайжонлик шахс тарафидан жинсий зўравонликка учраганди.