Украина бўйича Флорида музокаралари қандай ўтди?

АҚШ Давлат котиби Марко Рубио АҚШнинг Флорида штатида кеча, 30 ноябрь куни бўлиб ўтган АҚШ–Украина музокараларини “жуда самарали” деб баҳолади, бироқ Россия–Украина урушини тугатиш учун ҳали кўп иш қилиш зарурлигини ҳам қайд этди. Учрашув якунлари бўйича хулосаларни CNN эълон қилди.

Рубионинг айтишича, йиғилиш Женевадаги учрашув натижалари ҳамда жорий ҳафтадаги жараёнлар асосида давом эттирилган. 

“Биз жуда самарали навбатдаги учрашувни ўтказдик. Аммо ҳақиқий тинчликка эришиш учун яна анча иш қилишга тўғри келади”, деган Рубио. 

Шунингдек, у Россия “ечим формуласининг бир қисмига айланиши” кераклигини таъкидлади. Рубио 1 декабрь куни АҚШ Президентининг махсус вакили Стив Уиткофф Москвага йўл олишини тасдиқлаган. 

Давлат котибининг сўзларига кўра, музокараларда нафақат урушни тўхтатиш шартлари, балки Украинага узоқ муддатли хавфсизлик кафолатларини бериш ҳам муҳокама қилинган. 

“Биз Украинанинг доимий хавфсизлигини таъминлашни истаймиз. Энг муҳими – бу ерда ҳақиқий фаровонлик даври бошланишини хоҳлаймиз”, деган у. 

Украина делегацияси раҳбари, Миллий хавфсизлик ва мудофаа кенгаши (МХМК) котиби Рустам Умаров ҳам учрашув якунларини “самарали ва муваффақиятли” дея таърифлаган.

“Бизнинг мақсадимиз – кучли, равнақ топган Украина. Музокараларда мамлакатимиз учун муҳим бўлган барча масалаларни кўриб чиқдик. АҚШ жуда кучли қўллаб-қувватлаш кўрсатди”, деган Умаров. 

У Флорида сессияси Женевадаги музокаралар асосида ўтказилганини қўшимча қилган. 

Шу билан бирга, Умаров Зеленскийга АҚШ билан позициялар яқинлашгани ҳақида ҳисобот берганини маълум қилган. 

CNN ўз манбасига таяниб, музокараларни “қаттиқ, лекин жуда конструктив” деб атаган. Томонлар Россия–Украина можаросини тартибга солиш бўйича “энг нозик масалалар”ни муҳокама қилгани айтилади.

“The Wall Street Journal” эса музокараларда ҳудудий масалалар ва Украинада сайлов ўтказиш масаласи ҳам кўтарилганини хабар қилган.

Эслатиб ўтамиз, аввалроқ Дональд Трамп Украинада коррупция билан боғлиқ муаммолар борлигига қарамай, келишув тузиш имконияти сақланаётганини билдирганди.