Украина Путиннинг қароргоҳига ҳужум қилмаган – МРБ

АҚШ Марказий разведка бошқармаси (МРБ, CIA) Украинани Россия Президенти Владимир Путиннинг Новгород вилояти – Валдайдаги қароргоҳига ҳужум қилишга уринган, деб ҳисобламайди. Бу ҳақда кеча, 31 декабрь куни ўз манбаларига таяниб, “The Wall Street Journal” хабар берди.

МРБ хулосасига кўра, 29 декабрга ўтар кечаси украин дронлари Путиннинг қароргоҳи жойлашган ҳудуд билан бир минтақадаги ҳарбий объектга зарба беришга уринган, бироқ ушбу объект қароргоҳга яқин жойлашмаган.

Нашрнинг ёзишича, АҚШ разведкаси Россия ҳаво ҳудудини ва унинг ҳудудига уюштирилаётган ҳужумларни сунъий йўлдошлар ва радарлар орқали кузатиш имкониятига эга.

МРБ директори Жон Рэтклифф разведка хулосаларини АҚШ Президенти Дональд Трампга етказган. Орадан кўп ўтмай, Трамп ўзининг Truth Social ижтимоий тармоғида “New York Post” газетасининг таҳририй мақоласига ҳавола эълон қилган. Унда Украина Путиннинг қароргоҳига зарба бермагани айтилган. Трамп ушбу ҳаволани мақола сарлавҳаси – “Путиннинг “ҳужум” ҳақидаги шов-шувли баёнотлари айнан Россия тинчликка тўсқинлик қилаётганини кўрсатади” билан бирга жойлаштирган.

МРБ бу борада изоҳ беришдан бош тортган.

Москва эса Украинага тегишли 91 та учувчисиз учиш аппарати Валдайдаги Путиннинг қароргоҳига ҳужум қилишга уринганини даъво қилмоқда. Россия Президенти бу ҳақда 29 декабрь куни Дональд Трамп билан бўлган телефон суҳбатида айтган. Шундан сўнг, Трамп журналистларга “жуда ғазабланганини” ва ҳозир “бунинг учун мос вақт эмаслигини” билдирган. Украина Путиннинг қароргоҳига ҳужум қилишга уринганини рад этган. Украина ТИВ эса Украина Қуролли кучлари “Россиянинг Украинага қилган зарбаларига жавобан Россия ҳудудидаги фақат қонуний ҳарбий объектларга зарба беришини” маълум қилган.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев Россия Федерацияси Президенти Владимир Путин билан телефон орқали мулоқот қилиб, айтилаётган ушбу ҳужум қилишга уринишни қоралаган эди.