Усик Украина президентлигига номзодини қўймоқчи

Машҳур украиналик боксчи, супероғир вазн тоифасида WBC, WБА, IBO ва IBF чемпиони Александр Усик Украина президентлигига номзодини қўйиш ниятини билдирди. Бу ҳақда РБК-Украина хабар берди.  

Усик украиналик телебошловчи Андрей Бедняковга берган интервьюсида келажак режалари ҳақида сўз юритди. Суҳбат давомида у боксдаги фаолияти узоқ давом этмаслигини ва кейинчалик йўналишини ўзгартириш ниятида эканини айтди.

“Яна бир неча йил бокс билан шуғулланишни режалаштиряпман. Шундан сўнг ҳукуматда ишлашни истайман”, дейди Усик.

Нашрнинг ёзишича, Бедняков ҳазил тариқасида боксчи “Конотоп шаҳри мэри бўлишни мақсад қилгандирсиз”, деган тахминни илгари сурган. Бунга жавобан чемпион: “Қаранг, мен президентдан паст лавозимга рози бўлмайман”, дея жавоб қайтарган.

Таъкидлаш жоиз, Усик аввал ҳам Украинани бошқариш масаласида фикр билдирган. У кўпчилик билан суҳбатда президентлик сайловларида иштирок этиш эҳтимолини истисно этмаган.

Айни пайтда спорт фаолиятини давом эттираётган Усикнинг навбатдаги жангида нидерландиялик кикбоксинг афсонаси Рико Верхувенга қарши рингга чиқиши кутилмоқда.