Ўзбекистон элчиси Непал Президентига ишонч ёрлиқларини топширди

Ўзбекистоннинг Непалдаги биринчи элчиси (қароргоҳи Деҳли шаҳрида) Сардор Рустамбоев ушбу мамлакат Президенти Рам Чандра Пауделга ишонч ёрлиқларини топширди. Бу ҳақда “Дунё” хабар берди.

Непал раҳбари Ўзбекистоннинг биринчи элчиси тайинлангани учун чуқур миннатдорлик билдириб, Тошкент билан кўп қиррали алоқаларни ривожлантиришдан манфаатдор эканини таъкидлаган.

Учрашув давомида томонлар икки томонлама кун тартибидаги кенг кўламли масалаларни муҳокама қилган.

Савдо-иқтисодий ҳамкорликни чуқурлаштириш истиқболларига алоҳида эътибор қаратилган. Непал томони гидроэнергетика, туризм ва таълим каби соҳаларда ўзаро алоқалар учун улкан салоҳият мавжудлигини қайд этиб, қўшма лойиҳаларни амалга оширишга тайёрлигини билдирган.

Президент Рам Чандра Паудел халқаро ташкилотлар доирасида ўзаро манфаатли ҳамкорликни ривожлантириш муҳимлигини қайд этган. У глобал иқлим ўзгариши ва тоғлар экологияси каби долзарб масалалар бўйича биргаликда ишлашга бўлган ўзаро қизиқишга эътибор қаратган.

Суҳбат якунида Рам Чандра Паудел Непалнинг узоқ муддатли дўстона шерикликка содиқлигини тасдиқлаган ва Ўзбекистон билан ҳамкорликни мустаҳкамлашга қаратилган барча ташаббусларни қўллаб-қувватлашга тайёр эканини маълум қилган.

Маълумот учун, Ўзбекистон ва Непал ўртасида дипломатик муносабатлар 2018 йил 26 январь куни ўрнатилган.

Эслатиб ўтамиз, Ўзбекистоннинг янги элчиси Сардор Рустамбоев Деҳлида 2024 йилнинг январь ойида ўз фаолиятини бошлаган. Бундан олдин у Ўзбекистоннинг Франция ва Португалиядаги дипломатик ваколатхонасига раҳбарлик қилган.