Ўзбекистон СИдан фойдаланиш даражаси паст давлатлар қаторига кирди

Жорий йилнинг биринчи чорагида Ўзбекистонда 15 ёшдан 64 ёшгача бўлган аҳолининг 7,2 фоизи генератив сунъий интеллектдан (СИ) фойдаланган. Бу ҳақда Microsoft компаниясининг Global AI Diffusion Report ҳисоботида сўз боради.

Унга кўра, Ўзбекистоннинг кўрсаткичи дунёдаги ўртача даражадан пастроқ. Жаҳон миқёсида генератив сунъий интеллект фойдаланувчиларининг улуши 2026 йилнинг биринчи чорагида 16,3 фоиздан 17,8 фоизгача кўтарилган.

Марказий Осиё мамлакатлари ўртасида кўрсаткичлар қуйидагича:

• Қозоғистон – 15,9%;
• Қирғизистон – 9,5%;
• Ўзбекистон – 7,2%;
• Тожикистон – 6,1%;
• Туркманистон – 6,1%.

Жаҳон рейтингининг етакчиси сифатида БАА қайд этилган – бу мамлакатда аҳолининг 70,1 фоизи генератив сунъий интеллектдан фойдаланади. Иккинчи ўринни 63,4 фоизлик кўрсаткич билан Сингапур эгаллаган. Кучли бешликка, шунингдек, Норвегия, Ирландия ва Франция ҳам кирган.

Microsoft экспертларининг таъкидлашича, дунёда сунъий интеллектнинг жорий этилиши бир текисда кечмаяпти. Бунинг асосий сабаблари сифатида интернетдан фойдаланиш имконияти, электр таъминотининг барқарорлиги, рақамли инфратузилма сифати ва рақамли кўникмалар даражасидаги фарқлар кўрсатилган.

Эслатиб ўтамиз, “Microsoft Institute for the Economy of AI” томонидан эълон қилинган 2025 йилги ҳисоботда ҳам Ўзбекистон паст натижа кўрсатиб, сунъий интеллектдан фойдаланиш даражаси бўйича дунёнинг 147 мамлакати орасида 141-ўринни эгаллагани қайд этилган эди.