ЎзЖОКУда форма киймаган 100 га яқин талаба дарсга киритилмади (видео)

Бугун, 16 февраль куни Ўзбекистон журналистика ва оммавий коммуникациялар университетида (ЎзЖОКУ) форма киймаган ва дарсга кеч қолган ўнлаб талабалар машғулотларга киритилмади. Бу ҳақда ушбу университет талабаси Баҳодир Элибоев ўзининг Facebook’даги саҳифасида маълум қилди.

Унинг айтишича, бакалавр ва магистратура босқичида ўқиётган қарийб 100 нафарга яқин талаба дарсга қўйилмаган.

Видеода университетнинг биринчи босқич магистранти Акмал Йўлдошев галстук тақмагани учун дарсга киритилмаганини, бу ички тартиб-қоидалар билан изоҳланганини билдирган. Талаба, шунингдек, бундай ҳолатлар кредит тўлашга сабаб бўлиб, қўшимча харажатларга олиб келаётганини айтган.

“Университетда таълим олишим учун улар менга хизмат кўрсатади. Бунинг учун университет билан ўртамизда шартнома тузилган. Пул тўлаганман. Мен хонада ўтириб ўқитувчидан дарс олишим керак, бу билим баҳоланиши ва охирида диплом берилиши керак. Шу икки муносабат бор. Ҳозир қандайдир ички тартиб қоида дея менинг истеъмолчилик, маънавий ва талабалик ҳуқуқларим бузиляпти”, деган Акмал Йўлдошев.

ЎзЖОКУ декани Ойша Зокирова вазиятга муносабат билдириб, олийгоҳ имижи, академик муҳит ва тартиб учун масъул эканини қайд этган. У ички тартиб-қоидаларга риоя қилиш муҳимлигини таъкидлаб, талабаларни университет шаънига путур етказмасликка чақирган. Шунингдек, масалани ижтимоий тармоқларда салбий талқинда ёритиш тўғри эмаслигини билдирган.

Олий таълим, фан ва инновациялар вазирлиги матбуот котиби Назокат Абдуқундузованинг маълум қилишича, айрим олий таълим муассасалари молиявий ва академик мустақилликка эга. Шу боис улар ўз ички тартиб-қоидаларини мустақил белгилаши мумкин ва талабалар ушбу қоидаларга амал қилиши тавсия этилади.

Эслатиб ўтамиз, аввалроқ QALAMPIR.UZ суриштирувидан кейин Тошкент давлат тиббиёт университети талабаларига стипендия тўлаб берилганди.