Warner Bros Гарри Поттерга тақлид қилган футболчини судга берди

Туркиянинг “Фенербаҳче” клуби футболчи Керем Актюркоглуни АҚШнинг Warner Bros медиа ширкати судга берди. Бу ҳақда “А Haber” нашри хабар берди.

Warner Bros’нинг даъвосига кўра, футболчи ижтимоий тармоқларида “Гарри Поттер” франшизасидаги визуал ва аудио элементлардан рухсатсиз фойдаланган. Шикоят Истанбул фуқаролик судига интеллектуал ва саноат мулк ҳуқуқлари доирасида топширилган. 

Компания аризасида “Гарри Поттер”, “Хогвартс” ва “Гриффиндор” каби савдо белгиларининг Туркия Патент ва савдо белгилари идорасида расмий рўйхатга олингани таъкидланди. Warner Bros’нинг фикрича, бу белгилар фақат китоблар ва фильмларга тегишли бўлиб қолмай, балки жаҳон миқёсида тан олинган тижорат бренди ҳисобланади. Шикоятда футболчининг ижтимоий тармоқдаги контенти ва товар белгиларидан рухсатсиз фойдаланганлиги кўрсатиб ўтилган.

27 ёшли форвард мухлислар томонидан “Гарри Поттер” лақабини олган бўлиб, голларни нишонлашда хаёлий таёқча билан сеҳр қиладиган Гарри Поттерга тақлид қилиши билан машҳур. 

Керем Актюркоглу жорий йилнинг 24 октябрь куни UEFA Европа лигаси доирасида Германиянинг “Штутгарт” клубига қарши ўйинда Гарри Поттерга тақлид қилиш билан гол нишонлашни амалга оширган эди. Кейинчалик футболчи ушбу ҳаракатларини ўзининг ижтимоий тармоқларига жойлаган.

Маълумот учун, Актюркоглу жорий мавсумда Португалиянинг “Бенфика” жамоасидан “Фенербаҳче”га кўчиб ўтган эди. Футболчи 2020-2024 йилларда “Галатасарой”да 4 йил давомида фаолият юритган.