Яқин Шарқ осмони ёпилди. Аэропортларда ўн минглаб сайёҳлар қолиб кетди

Яқин Шарқ бўйлаб давом этаётган ҳарбий ҳаракатлар туфайли бугун, 1 март куни ҳам аэропортлар ёпиқлигича қолди. Бу ҳақда маҳаллий нашрлар хабар берди. 

Исроил, Қатар, Сурия, Эрон, Ироқ, Қувайт, Баҳрайн ва Бирлашган Араб Амирликлари ўз ҳаво ҳудудини ёпган. Emirates Airlines авиакомпанияси Дубайга ва ундан қайтадиган барча рейсларни камида 1 март куни тушгача тўхтатган. Qatar Airways маълумотларига кўра, Қатар аэропорти камида 2 март тонгигача ёпиқ бўлади. Эрон ва Исроил ҳам ўз ҳаво ҳудудларини ёпган.

Бу Яқин Шарқдаги асосий ҳаво тугунлари – Дубай, Абу-Даби ва Доҳа аэропортларининг ёпилишига олиб келган. Минтақавий авиакомпаниялар 1800 дан ортиқ рейсни бекор қилган.

Cirium авиация таҳлилий компаниясининг маълумотларига кўра, ушбу аэропортларда фаолият юритувчи учта йирик авиакомпания – Emirates, Qatar Airways ва Etihad одатда кунига 90 мингга яқин йўловчига хизмат кўрсатади. Аэропортларда эса ўн минглаб сайёҳлар қолиб кетган

Эслатиб ўтамиз, кеча, 28 февраль куни АҚШ ва Исроил Эроннинг ҳарбий объектларига қатор зарбалар бериш орқали унга қарши уруш бошлади. Эрон бунга жавобан Исроилга ва АҚШнинг Яқин Шарқдаги ҳарбий базаларига ҳужум қилди. Эрон зарбалари остида бир нечта аэропортлар, жумладан, Дубай аэропорти ҳам қолган. Бунинг ортидан Бирлашган Араб Амирликлари, хусусан Дубай шаҳрида бўлиб турган Ўзбекистон Республикаси фуқароларидан хавфсизлик талабларига риоя қилиш сўралди.

АҚШ–Исроил–Эрон уруши

Кеча, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Исроил томонидан старт берилган операция “Еҳуда қалқони” деб номланган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига «иммунитет» олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.

Аввалроқ, Эрон давлат телевидениеси Хоманаий Исроил ва АҚШ томонидан ўлдирилганини хабар қилган эди. Эроннинг “Tasnim” ахборот агентлиги маълумотларига кўра, у кеча, 28 февраль куни эрталаб ўз ишхонасида ўлдирилган. Оятуллоҳнинг вафоти муносабати билан мамлакат бўйлаб 40 кунлик умумхалқ мотами ва 7 кунлик умумхалқ дам олиш кунлари эълон қилинди.

Шунингдек, Эрон ҳудудига уюштирилган ҳужум чоғида Оятуллоҳнинг оила аъзоларидан тўрт киши – қизи, куёви, набираси ва келинларидан бири ҳам ҳалок бўлган.

Қайд этиш жоиз, Эрон Ислом инқилоби қўриқчилари корпуси Ислом Республикаси Олий раҳбари Оятуллоҳ Али Хоманаийнинг вафоти тасдиқланганидан сўнг, мамлакат “Қуролли кучлари тарихидаги энг шиддатли ҳужум операцияси” бошланганини маълум қилганди.

Шундан сўнг, Эрон Ислом инқилоби қўриқчилари корпуси мамлакат Исроил ва АҚШга қарши янги ҳужумлар бошланганини эълон қилди.