Ямаль дастхатларини сотишни режалаштиряпти

Испания терма жамоаси ва “Барселона” ёш юлдузи Ламин Ямаль энди мухлислар учун дастхат бермайди. Бу унинг реклама фаолиятини бошқарувчи агентликнинг янги қарори билан боғлиқ. Ямаль эса ўз дастхатини фақат махсус савдо платформаси орқали сотишни режалаштирмоқда. Бу ҳақда “Mundo deportivo” нашри хабар берди.

Манбаларга кўра, спорт юлдузларининг имзоланган кийимлари ва атрибутларини тижорат асосида сотувчи компания футболчига шартнома таклиф қилган. Шу боис, Ямаль ҳозирча имзо беришни тўхтатган, бироқ мухлислар билан суратга тушишда давом этмоқда. “Барселона” клуби ҳам бу вазиятни табиий ҳол сифатида қабул қилган.

Клубнинг маълум қилишича, Ямаль жамоа мажбуриятларини бажариш доирасида маълум миқдордаги дастхатларга рухсат бериш масаласида музокаралар олиб бормоқда. Футболчининг имзоси ҳозирча кам бўлгани сабабли унинг қиймати янада юқори ҳисобланади.

Мазкур шартнома ҳали имзоланмаган, аммо томонлар битимни якунлаш ниятида. Бундай маркетинг модели, айниқса, АҚШ спорт бозорида, хусусан, NBA юлдузлари орасида кенг тарқалган. “Барселона” Ламин Ямалнинг бу қарорини тушуниш билан қабул қилган. Клуб уни академиянинг фахри сифатида кўради.

Маълумот учун, Ламин Ямаль бугунги кунда Adidas, Beats, Powerade, Oppo, Konami ва Nesquik каби йирик брендларнинг юзи саналади, шунингдек, у UNICEF элчиси ҳисобланади.