Яна бир жаҳон чемпиони ЎФА таклифини рад этди – ОАВ

Ижтимоий тармоқларда Ўзбекистон футбол ассоциацияси раҳбарияти 2006 йилги Жаҳон чемпиони ва “Олтин тўп” соҳиби Фабио Каннаваро билан музокара ўтказиш учун Италияга боргани ҳақида хабарлар тарқалди. Маълум бўлишича, италиялик мутахассис ЎФА таклифини рад этган. Бу ҳақда Каннаварога яқин манбаларга таяниб, “Sport-express” хабар берди.

Нашрнинг ёзишича, 52 ёшли мутахассис Ўзбекистон миллй терма жамоасига мураббийлик қилишдан бош тортган.  Мураббийга яқин манба эса буни тасдиқлаган. Манбага кўра, Каннаваро Италия А сериясидаги амалдаги мураббийлардан бири ишдан бўшатилса, ушбу чемпионат клубларидан бирига ишга киришга умид қилмоқда.

Маълумот учун, Фабио Каннаваро футболдаги фаолиятини якунлагач, Яқин Шарқ ва Хитой клубларини бошқарган. 2019 йилда у Хитой терма жамоаси бош мураббийи этиб тайинланган. 2022 йилдан 2023 йилгача Италиянинг “Беневенто” клуби бош мураббийи бўлиб ишлаган. 2024 йилнинг апрелида у “Удинезе” (Италия) клубини қабул қилиб олган ва бир муддат ишлаган.  Шундан сўнг, Каннаваро Хорватиянинг “Динамо Загреб” клубида ҳам бош мураббий сифатида фаолият юритган. Ҳозирги кунда эса ишсиз.

Қайд этиш жоиз, ЎФА раҳбарияти анчадан бери миллий терма жамоага бош мураббий қидирмоқда. Каннавародан олдинроқ Паулу Бенту, Фотиҳ Терим ва Йоахим Лёв номлари ҳам кўриб чиқилган. Бироқ Йоахим Лёв ва Паулу Бенту Ўзбекистон миллий терма жамоасини бошқариш таклифини рад этган.

Ҳозирги кунда МТЖни бошқараётган Тимур Кападзе ҳам CAFA Nations Cup-2025 мусобақаси олдидан матбуот анжуманида ЎФА Жаҳон чемпионатини кўрган, тажрибали мутахассис жамоада иш бошлашини хоҳлаётганини тасдиқлаганди.