Янги Тошкентга борадиган метро қачон қуриб битказилиши айтилди (видео)

Янги Тошкент шаҳридаги илк метро йўналиши 2026 йил охиригача қуриб битказилади. Бу ҳақда Янги Тошкент дирекцияси маълум қилди.

Билдирилишича, лойиҳа қиймати 110 млн АҚШ долларини ташкил этиб, унинг доирасида 8 км узунликдаги 3 та бекатдан иборат метро қурилади. Туркиянинг “Xvav Yapi Sanayi Ve Tic.A.S.” компанияси томонидан амалга оширилаётган мазкур лойиҳа “Дўстлик” бекатидан Янги Тошкентгача бўлган йўналишнинг бир қисми бўлади. 

Лойиҳа қийматининг 11 млн доллари 2025 йилда, қолган 99 млн доллари эса 2026 йилда ўзлаштирилиши режа қилинган.

Маълумот учун, жорий йил 16 июнь куни Президент Шавкат Мирзиёев Тошкент шаҳрида режалаштирилган қурилиш ва жамоат транспорти лойиҳалари тақдимоти билан танишган ва унда Янги Тошкент шаҳрига ҳам борадиган метро йўли барпо этилиши кўрсатилган. У ҳозирги “Дўстлик” метро бекатидан бошланиб, янги марказгача боради. Узунлиги 21 километр, 9 та бекатдан иборат бўлиши кутилаётган бу метро кунига 230 минггача йўловчиларни қамраб ололади.

Эслатиб ўтамиз, жорий йил 2 август санасидан бошлаб Тошкент метросининг 6 та бекатдан иборат “Технопарк – Янгиобод” бекатлари оралиғида метро поездлар ҳаракати тўхтатилганди. Бунга сабаб сифатида режали профилактик ишлар кўрсатилган.