Янги йилда маст бўлиб қолган эркак ўз улфатини ўлдириб қўйди (видео)

Пойтахт Тошкентда маст эркак ўзи билан бирга спиртли ичимлик истеъмол қилган шеригини пичоқлаб ўлдирди. Бу ҳақда Тошкент шаҳар Ички ишлар бош бошқармаси хабар берди. 

Маълум қилинишича, ҳолат Тошкент шаҳрининг Мирзо Улуғбек туманида содир бўлган. 2025 йилнинг ўзида ичкилик сабаб нақ саккиз марта маъмурий жавобгарликка тортилган фуқаро Янги йил байрами арафасида шишадоши билан ўзини билмас даражада спиртли ичимлик истеъмол қилган ва ўртада келиб чиққан жанжал ортидан уни ўлдирган. 

ИИББга кўра, фуқаро ўтган йилнинг ўзида 5 сутка маъмурий қамоқ жазосини ҳам ўтаб чиққан. 

Мазкур ҳолат ортидан прокуратура томонидан Жиноят кодексининг 97-моддаси (қасддан одам ўлдириш) билан жиноят иши қўзғатилиб, гумонланувчига нисбатан қамоқ эҳтиёт чораси қўлланилган. 

Эслатиб ўтамиз, ўтган йилнинг 29 ноябрида ичиб олиб фуқароларнинг тинчини бузган ва ички ишлар органи ходимларига қаршилик кўрсатган аёллар ҳам жазоланган эди.