ЕИ Маскнинг компаниясига катта миқдорда жарима солди

Еврокомиссия америкалик миллиардер Илон Маскнинг ижтимоий медиа платформаси Х’ни ЕИ рақамли хизматлар регламенти доирасидаги “ошкоралик мажбуриятларини бузгани” учун 120 миллион евро (тахминан 139 миллион 728 минг доллар) миқдорида жаримага тортди. Бу ҳақда Еврокомиссия хабар берди.

Европа Комиссияси Х’нинг “кўк белги” дизайни нотўғри эканини аниқлади, чунки у аккаунт эгасининг шахсини текшириш воситаси эмас, балки пуллик хусусиятга айлантирилган, ташкилотга кўра, Х’нинг реклама кутубхонасида шаффофлик йўқ, платформа эса тадқиқотчиларга қонун бўйича очиқ бўлиши керак бўлган маълумотлардан фойдаланиш имкониятини бермаган.

Еврокомиссия 120 миллион евро жаримага тортилган якунланган ишдан ташқари Х’га қарши ижтимоий тармоқнинг ноқонуний контент тарқалишининг олдини олиш ва ахборот манипуляциясига қарши курашиш борасидаги саъй-ҳаракатлари самарадорлиги бўйича яна бир қанча суд жараёнларини ўтказмоқда.

Европа Иттифоқининг “Рақамли хизматлар тўғрисида”ги низоми компанияларга йиллик глобал айланмасининг 6 фоизигача жарима солишга имкон беради. Х’нинг айланмаси бир неча миллиард еврога баҳолансада, Илон Маскнинг барча бизнесларининг умумий айланмаси бундан бир неча баравар юқори.

Европа Комиссияси вице-президенти Хенна Вирккунен қонунбузарликларнинг табиати, жиддийлиги ва давомийлигини инобатга олган ҳолда жаримани мутаносиб деб баҳолади. Бироқ у мутаносиблик тамойилига ишора қилиб, уни “оддий иқтисодий формулага қисқартириб бўлмайди” деб, ҳисоблаб чиқиш усули ҳақида батафсил маълумот беришдан бош тортди.

“Politico” нашри таъкидлаганидек, Брюсселнинг ушбу қарори технология компанияларини тартибга солиш бўйича Европа Иттифоқи ва АҚШ ўртасидаги муносабатлардаги кескинликни оширади. Вашингтон бир неча бор Европа Иттифоқининг рақамли хизматларни тартибга солишини танқид қилиб, уни цензура билан тенглаштирган ва жавоб тариқасида Европа импортига қўшимча тарифлар жорий этиш билан таҳдид қилган.

Куни кеча АҚШ вице-президенти Жей Ди Вэнс бундай жарималарни Америка компанияларига ҳужум деб атади.

“Европа комиссияси цензура билан шуғулланмагани учун Хʼни юзлаб миллион доллар жарима солиши ҳақида миш-мишлар бор. Европа Иттифоқи сўз эркинлигини қўллаб-қувватлаши ва Америка компанияларига хаёлпараст даъволар учун ҳужум қилмаслиги керак”, деб ёзди Вэнс ўзининг Х саҳифасида.

Европа Комиссияси низомнинг цензурага ҳеч қандай алоқаси йўқлигини, фақат шаффофликни таъминлашини таъкидламоқда.

Эслатиб ўтамиз, аввалроқ АҚШнинг биринчи хоними Мелания Трамп ва тадбиркор Илон Маск АҚШ фуқаролигидан маҳрум қилиниши мумкинлиги ҳақида хабар берилганди.