Юлдуз Усмонованинг концертида катта можаро чиқди (видео)

Кеча, 29 май куни ижтимоий тармоқларда Наманган вилоятида бўлиб ўтган Юлдуз Усмонованинг концертида ташкилотчилар 2400 ўринлик жойга 7000 дан ортиқ чипта сотгани ва оқибатда томошабинлар концертга бостириб киргани айтилган хабарлар тарқалди. Мазкур хабарлар юзасидан Ички ишлар вазирлиги Жамоат хавфсизлиги департаменти муносабат билдирди.

Қайд этилишича, концерт дастури жорий йилнинг 28 май куни бўлиб ўтган. Концерт ўтказилган Давлатобод тумани Ғирвонсой кўчасида жойлашган “Афсоналар водийси” боғининг ёзги амфитеатри 2 сектордан иборат бўлиб, 2664 нафар томошабинга мўлжалланган.

Тадбир ташкилотчилари томонидан концерт куни таклифнома асосида кирадиган фуқаролар учун амфитеатрнинг олди томонига қўшимча яна 500 та ўриндиқлар қўйилган. Концертга чипта билан ташриф буюрган аксарият фуқаролар ўзлари билан 2-3 нафаргача вояга етмаган фарзандларини олиб келган ҳамда улар чипта олган бошқа фуқароларнинг жойларини эгаллаб олган.

Шу сабабли амфитеатр ўриндиқлари тўлиб қолган ва кўплаб томошабинлар залга кира олмаган. Концерт дастурини ўтказиш даврида жамоат хавфсизлигини таъминлаш мақсадида юзга яқин ҳудудий Ички ишлар бошқармаси, Миллий гвардия ва Фавқулодда вазиятлар бошқармасининг шахсий таркиби хизматга жалб этилган ва улар концерт дастурини ўтказиш даврида фавқулодда ҳолатлар ва кўнгилсиз ҳодисалар содир этилишига йўл қўймаган.

Билдирилишича, ҳозирда ҳолат юзасидан терговга қадар текширув ўтказилмоқда.