Юрген Клопп “Ливерпуль”га қайтиши мумкин

Англиянинг “Ливерпуль” собиқ бош мураббийи Юрген Клопп келажакда мерсисайдликларни яна бошқариши “назарий жиҳатдан мумкин”лигини маълум қилди, бироқ у ҳозирча мураббийлик фаолиятини соғинмаётганини таъкидлади. Бу ҳақда ESPN нашри хабар берди.

Клопп 2024 йилда “Ливерпуль”ни тўққиз йиллик муваффақиятли фаолиятидан сўнг тарк этган ва маълум муддат танаффус қилишини билдирган эди. Ҳозирда у Red Bull футбол тизимида глобал футбол бўйича раҳбар сифатида фаолият юритмоқда.

“Мен Англияда бошқа жамоани бошқармаслигимни айтганман. Демак, агар қайтишим мумкин бўлса, бу фақат “Ливерпуль” бўлади. Ҳа, назарий жиҳатдан бу мумкин”, деди немис мутахассиси “Diary of a CEO” подкастига берган интервьюсида.

Шу билан бирга, Клопп ҳозирча мураббийликка қайтиш истаги йўқлигини ҳам қўшимча қилди.

“Мен ҳозирги ишимни яхши кўраман. Мураббийликни соғинмайман. Энди ёмғир остида уч соат туриш, ҳафтасига бир неча марта матбуот анжуманларига бориш истаги йўқ. 1080 та ўйинда мураббийлик қилганман бу етарлича тажриба”, дейди Клопп.

Шунингдек, Клопп ўз ўрнини эгаллаган Арне Слот билан мунтазам мулоқот қилиб турганини айтиб ўтди. У “Ливерпуль” янги мураббий қўл остида ўтган мавсумда Премьер-лига чемпионлигини қўлга киритгани ҳақида илиқ фикр билдирди.

“Арне жуда ақлли йигит, у дастлаб жуда кўп ўзгаришлар қилмаган. Бу ёзда бўлган трансфер ойнасидан сўнг муаммолар пайдо бўлиши табиий. Аммо у жамоани энг юқори даражага олиб чиқди”, деди у.

Маълумот учун, Юрген Клопп 2015 йилдан 2024 йилгача “Ливерпуль”ни бошқарган даврида клуб тарихидаги энг муваффақиятли мураббийлардан бирига айланди. У 491 та ўйинда жамоани бошқарган, шулардан 304 тасида ғалаба қозонган. Клопп қўл остида “Ливерпуль” 2019 йилда Чемпионлар лигасини, 2020 йилда эса 30 йиллик танаффусдан сўнг Премьер-лига ғолиблигини қўлга киритганди.