Z-авлод хавотирда: СИ кўплаб иш ўринларига даъвогарлик қиляпти

Сунъий интеллект сабаб йирик компанияларда минглаб ходимлар ишдан бўшатилмоқда. Бу эса ёшлар орасида технологияга нисбатан хавотир ва норозиликни кучайтирди. Бу ҳақда “Reuters” хабар берди.

Қайд этилишича, Standard Chartered компанияси 7 мингдан ортиқ иш ўрнини қисқартиришини маълум қилган. Компания айрим вазифаларни сунъий интеллект бажаришини режалаштирмоқда. Шу билан бирга, Meta глобал ишчи кучининг қарийб 10 фоизини қисқартириш устида ишлаётгани айтилмоқда. Amazon эса самарадорликни ошириш ва сунъий интеллект технологияларини кенг жорий этиш мақсадида 30 минг корпоратив иш ўрнини бекор қилган. Block компанияси ҳам ходимларининг деярли ярмини қисқартиргани қайд этилган.

Бу ҳолатлар ортидан ёшлар орасида сунъий интеллектга нисбатан салбий муносабат кучаймоқда. Айниқса меҳнат бозорига энди кириб келаётган Z-авлод вакиллари технологиялар келажакда уларнинг иш ўринларини эгаллаб олишидан хавотир олмоқда.

Google’нинг собиқ бош директори Эрик Шмидт Аризона университетида қилган чиқишида сунъий интеллектнинг таъсири “ҳар бир касб, ҳар бир лаборатория ва ҳар бир инсон ҳаётига” етиб боришини айтган. Унинг сўзларига кўра, бу ўзгаришлар олдинги технологик инқилоблардан ҳам тезроқ ва кучлироқ бўлади.

Gallup компаниясининг апрель ойидаги тадқиқоти ҳам ёшлар орасида хавотир кучайганини кўрсатди. Сўровда қатнашганларнинг қарийб ярми сунъий интеллектнинг хавфи фойдасидан устун эканини билдирган. Ҳисобот муаллифлари сўнгги бир йил ичида ёшларнинг технологияга нисбатан салбий кайфияти сезиларли даражада ошганини таъкидлаган.

Шунга қарамай, кўплаб компаниялар сунъий интеллектни бизнеснинг ажралмас қисмига айлантиришда давом этмоқда. Мутахассислар эса яқин йилларда бу технология меҳнат бозори ва кундалик ҳаётни тубдан ўзгартиради деб ҳисоблайди.

Эслатиб ўтамиз, аввалроқ Meta компанияси сунъий интеллект сабабли катта миқёсда ходимларни қисқартиришни режалаштираётгани ҳақида хабар берилган эди.