AQSH Maduroning oilasiga sanksiyalar joriy qildi

Vashington Venesuelaga bosimni kuchaytirayotgan bir paytda, Qo‘shma Shtatlar kecha, 19 dekabr kuni Prezident Nikolas Maduro, uning rafiqasi va oila a’zolari hamda sheriklariga qarshi sanksiyalar joriy qildi. Bu haqda “Reuters” agentligi xabar berdi.

AQSH Moliya vazirligi Maduro va uning rafiqasi bilan bog‘liq yetti kishiga nisbatan sanksiyalar joriy etganini ma’lum qildi. Moliya vaziri Skott Bessent ularni “Nikolas Maduroning noqonuniy giyohvand moddalar davlatini qo‘llab-quvvatlashda” aybladi.

“Biz Venesuelaning mamlakatimizni halokatli giyohvand moddalar bilan to‘ldirishda davom etishiga yo‘l qo‘ymaymiz. Maduro va uning jinoiy sheriklari yarimsharimizning tinchligi va barqarorligiga tahdid solmoqda. Tramp ma’muriyati uning noqonuniy diktaturasini qo‘llab-quvvatlovchi tarmoqlarni nishonga olishda davom etadi”, dedi Bessent.

Maduro va uning hukumati jinoyatchilikka aloqadorligini qat’iyan rad etib, AQSH Venesuelaning ulkan neft zaxiralarini nazoratga olish uchun uni hokimiyatdan ag‘darishga harakat qilayotganini aytmoqda.

So‘nggi oylarda AQSH Prezidenti Donald Tramp ma’muriyati Maduroga bosimni kuchaytirib, janubiy Karib dengizida keng ko‘lamli harbiy tayyorgarlikni amalga oshirmoqda. U mintaqadagi giyohvand moddalar tashishda gumon qilingan kemalarga qarshi zarbalar uyushtirdi, Venesuela qirg‘oqlari yaqinida sanksiyalangan neft tankerini musodara qildi va Venesuelaga kiruvchi va chiqayotgan barcha sanksiyalangan neft tankerlarini “blokada” deb e’lon qildi.

Tramp, shuningdek, Venesuelada quruqlikka zarbalar yaqin orada berilishini bir necha bor ta’kidlagan.

Shu kuni Maduroning rafiqasi Siliya Floresning jiyani Karlos Erik Malpika Floresning qarindoshlariga qarshi sanksiyalar joriy etildi. AQSHning ta’kidlashicha, Malpika Flores PDVSA davlat neft kompaniyasida korrupsiya fitnasiga aloqador bo‘lgan. U o‘tgan hafta Vashington tomonidan sanksiyalar ostida qoldi.

Eslatib o‘tamiz, avvalroq Maduro Trampdan iste’foga chiqishi evaziga pul va boshpana so‘ragani haqida xabar berilgandi.