Andijonda mahkumadan pul undirmoqchi bo‘lgan inspektor ushlandi

Andijon viloyatida mahkumdan noqonuniy yo‘l orqali pul undirmoqchi bo‘lgan probatsiya xizmati inspektori ishdan olindi. Bu haqda Ichki ishlar vazirligi xabar berdi. 

Qayd etilishicha, viloyat Ichki ishlar boshqarmasi probatsiya guruhi inspektori mahkum ayol bilan moddiy manfaatga qaratilgan noo‘rin munosabatga kirishib, ayolga ikki oydan beri go‘yoki o‘zining hisobidan firmaga 800 ming so‘m pul to‘laganini vaj qilib, 1 million 600 ming so‘m talab qilgan.

Holat yuzasidan ayol Shaxsiy xavfsizlik bosh boshqarmasi, Andijon viloyati bo‘yicha boshqarmasi xodimlariga murojaat yo‘llagan.

Viloyat Shaxsiy xavfsizlik boshqarmasi xodimlari tomonidan o‘tkazilgan maxsus yig‘ilishda probatsiya nazorati guruhi inspektorining yuqoridagi noo‘rin xatti-harakatlari muhokama qilinib, xodim yig‘ilish zalidan olib chiqib ketilgan.

Inspektor o‘z xohishi bilan ichki ishlar organlari tizimidan bo‘shagan.

Eslatib o‘tamiz, avvalroq Toshkent viloyatining Bekobod shahrida ichki ishlar xodimi 10 ming dollar bilan qo‘lga olingandi.