Armiyaga borgan yigit 1 hafta o‘tib vafot etdi

north_east

Qirg‘izistonda harbiylar qo‘lga olindi (video)

Qozog‘istonning Olmaota shahridagi chegara xizmati bo‘linmasida bir hafta oldin armiyaga chaqirilgan askar to‘satdan vafot etdi. Bu haqda “Tengrinews” xabar berdi.

Uning oilasi o‘lim haqida bugun, 5 oktyabr kuni ertalab xabar topgan. Oilasiga ko‘ra, Nurasil Anuar 2025 yil 27 sentyabrda muddatli harbiy xizmatga chaqirilib, “Qorasoy” chegara bo‘linmasida xizmat qilayotgan edi. U bir hafta o‘tib olamdan o‘tdi.

“Uni qo‘yib yuborishni istamadik – yuragimiz tashvishga to‘ldi. Lekin Nurasil o‘z vataniga xizmat qilishni, fuqarolik burchini ado etishni g‘urur bilan aytdi. Harbiy xizmatni o‘z yurti oldidagi sharaf va mas’uliyat deb bilardi”, deydi uning oilasi.

O‘limning dastlabki sababi, qarindoshlarining so‘zlariga ko‘ra, meningit, lekin oilada shubha bor: bir hafta oldin Nurasil butunlay sog‘lom edi va ularga kasallik haqida xabar berilmagan.

“Bugun ertalabdan beri jasadni ko‘ra olmayapmiz. Bizni u yerdan boshqa joyga yuborishyapti”, dedi bolaning xolasi jurnalistga.

Qarindoshlar xolis va har tomonlama tergov o‘tkazilib, barcha holatlar aniqlanib, zarur choralar ko‘rilishini so‘ramoqda.

“Nurasil mehribon, samimiy, rostgo‘y, juda yaxshi inson edi. U adolatga ishonar, hayotni sevardi. Uning vafoti biz uchun o‘rnini to‘ldirib bo‘lmaydigan yo‘qotish”, deydi yaqinlari.

Bundan oldin Mang‘istau viloyatida egizak akasi ortidan harbiy xizmatga borgan Dinmuhammad ismli harbiy xizmatchi halok bo‘lgan edi. Ular dastlab bitta harbiy qismda xizmat qilgan, biroq keyinchalik biri boshqasiga o‘tkazilgan. Shu yilning 17 sentyabr kuni oilasiga uning vafoti haqida xabar berildi. Dastlabki ma’lumotlarga ko‘ra, askar o‘z joniga qasd qilgan. Biroq uning qarindoshlari bu holatga ishonmagan.

Keyinroq Mudofaa vaziri o‘rinbosari Serik Borambayev 19 yoshli Dinmuhammadning o‘limiga izoh berdi. Uning so‘zlariga ko‘ra, aka-uka bir-biridan ajralmagan.

Eslatib o‘tamiz, avvalroq Olmaotadagi Milliy gvardiya harbiy xizmatchisi o‘zi xizmat qilayotgan harbiy qismdagi binoning uchinchi qavatidan o‘zini pastga tashlagandi.