Avstraliyadagi Trump Tower ochilganidan uch oy o‘tib yopildi

Avstraliya sharqidagi 1,5 milliard Avstraliya dollari (taxminan 1,1 milliard dollar) qiymatidagi Trump Tower osmono‘par binosi loyihasi avstraliyalik quruvchi o‘z majburiyatlarini bajarmagani sababli ishga tushirilgandan uch oy o‘tib yopildi. Bu haqda minora buyurtmachisi bo‘lgan Trump Organisation tashkiloti vakili ma’lum qildi.

“Bir necha oylik muzokaralar va taxminiy qiymati 1,5 milliard Avstraliya dollari bo‘lgan loyiha bo‘yicha quruq va’dalardan so‘ng [quruvchi] Altus Property Group eng asosiy moliyaviy majburiyatlarni bajara olmadi”, deya uning so‘zlarini keltiradi Avstraliyaning “The Sydney Morning Herald” gazetasi.

Altus Property Group quruvchi kompaniyasi rahbari Devid Yungning aytishicha, Erondagi urush va “boshqa voqealar” tufayli Amerika prezidenti Donald Trampning Avstraliyadagi brendi “zaharli bo‘lib qolgan”. Trump Organisation vakili bu bayonotni tanqid qilib, “shartnomaning bekor qilinishini ma’lum global voqealarga to‘nkash”ga urinishlar “o‘z xatolari va muvaffaqiyatsizliklaridan chalg‘itish uchun hiyla” ekanligini qo‘shimcha qildi. Uning ta’kidlashicha, Trump Organisation Avstraliyada boshqa loyihalarni ishga tushirish imkoniyatidan voz kechmayapti.

Amerika Prezidentining o‘g‘li Erik Tramp fevral oyida Avstraliya sharqidagi Gold-Kost shahrida 91 qavatli Trump Tower osmono‘par binosi qurilishini e’lon qildi va loyihaning vizualizatsiyasini X’da e’lon qildi. Bir necha oydan keyin ham qurilish boshlanmadi. Shu bilan birga, mahalliy aholining loyihani yopishni talab qilgan petitsiyasi 142 mingdan ortiq imzo to‘pladi.