Fransiya ham Grenlandiyaga qo‘shin yubordi

Fransiya Germaniya, Shvetsiya va Norvegiya bilan birgalikda Grenlandiyada qo‘shma harbiy mashqlarda ishtirok etmoqda. Harbiy mashg‘ulotlar Daniyani qo‘llab-quvvatlash va mintaqaviy xavfsizlikni mustahkamlashga qaratilgan. Bu haqda “France in English” nashri xabar berdi.  

Qayd etilishicha, Fransiya Grenlandiyadagi sovuq iqlim sharoitiga o‘zining tog‘ askarlarini yuborgan. Bu qaror AQSH Prezidenti Donald Trampning Grenlandiya suverenitetiga oid so‘nggi tahdidlaridan so‘ng qabul qilingan.

Fransiya Mudofaa vazirligi ma’lumotiga ko‘ra, tog‘ askarlari sovuq iqlim sharoitida mashq o‘tkazadi va ular Daniya kuchlari bilan hamkorlik qiladi. Hozircha aniq sonlar oshkor qilinmagan, lekin mashqlar 2026 yil 15–17 yanvar kunlari o‘tkazilishi rejalashtirilgan. 

Eslatib o‘tamiz, avvalroq uchta NATO davlati – Germaniya, Shvetsiya va Norvegiya ham Grenlandiyaga qo‘shin yuborishi aytilgandi. Ma’lumot uchun, Germaniya Grenlandiya poytaxti Nuuk shahriga 13 nafar razvedka askarini yuborib, kelgusidagi harbiy ishtirok imkoniyatlarini baholaydi, dengiz monitoringi sohasidagi sharoitlarni tekshiradi. Shvetsiya ham ushbu avtonom hududga Daniya boshchiligidagi mashqlarning keyingi bosqichlarini tayyorlash vazifasini bajarayotgan ofitserlarni jo‘natgan. Norvegiya esa qo‘shma missiyaga ikki askar bilan yordam beradi. 

Ushbu muvofiqlashtirilgan harakatlar, ayniqsa AQSHning mintaqaga oid strategik rejalari yuzasidan xavotirlar ortayotgan bir paytda, Grenlandiya xavfsizligini ta’minlashda Yevropa ittifoqchiligi naqadar muhim ekanini ko‘rsatadi. Germaniya Mudofaa vazirligi bayonotiga ko‘ra, razvedka ishlari mintaqaviy xavfsizlikni mustahkamlash uchun barqaror harbiy ishtirok doirasini shakllantirishga qaratilgan.