Medvedev Zelenskiyni “qonxo‘r masxaraboz”, Budanovni esa “terrorchi” deb atadi

Bugun, 2 yanvar kuni Rossiya Xavfsizlik kengashi raisining o‘rinbosari Dmitriy Medvedev Ukraina Prezidenti Vladimir Zelenskiyning mamlakat Mudofaa vazirligi Bosh razvedka boshqarmasi rahbari Kirill Budanovni Prezident ofisi rahbari etib tayinlash qarorini izohladi. Bu haqda TASS xabar berdi.

“Legitimligini yo‘qotgan qonxo‘r masxaraboz ofisning yangi rahbarini tanladi. U terrorchi Budanov bo‘ldi”, deydi Medvedev.

Uning fikricha, bu Zelenskiy uchun “a’lo tanlov”, chunki raqiblarni yo‘q qilish uchun unda “atigi bitta bo‘sh o‘rin” bor, aks holda u yana bir lavozimni sobiq Ukraina Qurolli kuchlari bosh qo‘mondoni Valeriy Zalujniyga taklif qilishi va “ikkala ehtimoliy raqibni ham prezidentlik saylovlari oldidan shaxmat taxtasidan darhol supurib tashlashi” mumkin edi.

Eslatib o‘tamiz, avvalroq  Vladimir Zelenskiy Kirill Budanovga Prezident devoni rahbari lavozimini taklif qilgani va hozirda uni Prezident devoni rahbari etib tayinlash bo‘yicha barcha rasmiy tartib-taomillar boshlangani haqida xabar berilgan edi.

Qayd etish joiz, 2025 yil noyabr oyining oxirida Ukraina Milliy aksilkorrupsiya byurosi va Ixtisoslashtirilgan aksilkorrupsiya prokuraturasi hukumat mahallasida Prezident devoni rahbari Andrey Yermakka tegishli joylarda tintuvlar o‘tkazgan edi. Ko‘p o‘tmay, Ukraina Prezidenti devoni rahbari Andrey Yermak iste’foga ariza bergani ma’lum bo‘ldi.