Moskvada yana ikki politsiyachi portlatildi

Bugun, 24 dekabr kuni Moskvada yo‘l harakati politsiyasi mashinasi portladi, oqibatda uch kishi, jumladan, ikki politsiya xodimi halok bo‘ldi. Portlash ikki kun oldin armiya generali o‘ldirilgan joydan 300 metr uzoqlikda sodir bo‘lgan. Bu haqda “Meduza” xabar berdi.

Ma’lum qilinishicha, Moskvada general-leytenant Fanil Sarvarov o‘ldirilgan joydan unchalik uzoq bo‘lmagan joyda yo‘l politsiyasi mashinasi portladi. Ikki yo‘l politsiyasi xodimi politsiya mashinasi yonida shubhali shaxsni ko‘rgan. Uni hibsga olish uchun yaqinlashganlarida portlovchi moslama portlatilgan. Ikki politsiya xodimi, shuningdek, xodimlar yonida turgan bir kishi halok bo‘lgan.

Xodimlar general Sarvarovning mashinasi portlagan joydan atigi 300 metr uzoqlikda, Orexovo-Borisovo tumanidagi Yeletskaya ko‘chasidagi politsiya bo‘limi yaqinida halok bo‘lgan. Rossiya huquqni muhofaza qilish organlariga yaqin bo‘lgan “Baza” va “Mash” Telegram-kanallari uchinchi shaxs yo‘l politsiyasi xodimlari uni hibsga olishga uringanida portlovchi moslamani portlatgan terrorchi bo‘lishi mumkinligini da’vo qilmoqda.

Xavfsizlik kuchlariga yaqin bo‘lgan bir manba bombani portlatgan odam firibgarlarning ko‘rsatmalari bo‘yicha harakat qilganini xabar qilmoqda. Hujumchilar uning ijtimoiy tarmoqdagi akkauntini buzib kirganini da’vo qilishmoqda. Buyurtmachilar uni politsiya mashinasi ostiga portlovchi moslama qo‘yishga ko‘ndirishgani taxmin qilinmoqda.

Eslatib o‘tamiz, avvalroq rossiyalik general mashinasida portlatib yuborilgani haqida xabar berilgandi.